ગાંધીનગર મનપા મ્યુનિસિપલ બોન્ડ ઇસ્યુ લાવનારી રાજ્યની પાંચમી મહાનગરપાલિકા બની

મુખ્યમંત્રી ભૂપેન્દ્ર પટેલે ગાંધીનગર મ્યુનિસિપલ કોર્પોરેશનના રૂ. 25 કરોડના મ્યુનિસિપલ બોન્ડનું નેશનલ સ્ટોક એક્સચેન્જ NSEમાં ગિફ્ટ સિટી ખાતેથી લિસ્ટિંગ કરાવ્યું હતું.

મુખ્યમંત્રીએ બેલ રિંગિંગ સેરેમનીથી આ NSE લિસ્ટિંગ ગાંધીનગરના મેયર મીરાબહેન પટેલ, ધારાસભ્ય રીટાબહેન પટેલ તેમજ મહાનગરપાલિકાના પદાધિકારીઓ-અધિકારીઓ અને NSEના અધિકારીઓની ઉપસ્થિતિમાં સંપન્ન કર્યું હતું. પ્રધાનમંત્રી નરેન્દ્ર મોદીની પ્રેરણા અને મુખ્યમંત્રી ભૂપેન્દ્ર પટેલના દિશાદર્શનમાં રાજ્યના શહેરી પરિવેશમાં પરિવર્તન અને નાગરિકોના સશક્તિકરણના અભિગમ સાથે 2025નું વર્ષ શહેરી વિકાસ વર્ષ તરીકે ઉજવવામાં આવી રહ્યું છે. આ શહેરી વિકાસ વર્ષમાં ગાંધીનગર મહાનગરપાલિકા અર્બન ઇન્ફ્રાસ્ટ્રક્ચર ફેસિલિટીઝમાં વૃદ્ધિ અને સસ્ટેઈનેબલ ડેવલપમેન્ટ દ્વારા ‘અર્નિગવેલ, લિવિંગવેલ’નો ધ્યેય આ મ્યુનિસિપલ બોન્ડના માધ્યમથી સાકાર કરશે.

ગાંધીનગર મહાનગર પાલિકા મ્યુનિસિપલ બોન્ડ ઈશ્યુ લાવનારી રાજ્યની પાંચમી મહાનગરપાલિકા બની છે. આ અગાઉ અમદાવાદ, સુરત, વડોદરા, રાજકોટ મહાનગરપાલિકાએ મ્યુનિસિપલ બોન્ડ બહાર પાડ્યા છે. પ્રધાનમંત્રીએ 2016માં દેશની અર્બન લોકલ બોડીઝને આત્મનિર્ભરતા દ્વારા સસ્ટેઈનેબલ ડેવલપમેન્ટ માટે સેબીના સહયોગથી મ્યુનિસિપલ બોન્ડ માર્કેટ ઊભું કરવા પ્રેરણા આપી હતી. આ સંદર્ભે કોર્પોરેશનની સ્થાપનાના 15 વર્ષમાં જ મ્યુનિસિપલ બોન્ડ ઈશ્યુ લાવનારી પ્રથમ મહાનગરપાલિકા ગાંધીનગર મહાનગરપાલિકા બની છે.

દેશમાં અત્યાર સુધીમાં 17 મહાનગરપાલિકાઓ દ્વારા રૂ.3359 કરોડના બોન્ડ ઈશ્યુ કરવામાં આવ્યા છે. તેમાંથી રૂ.925 કરોડના બોન્ડ ઈશ્યુ કરીને ગુજરાત 27 ટકાના ફાળા સાથે મહત્વની ભૂમિકા અદા કરી રહ્યું છે તેમ NSEના ચીફ બિઝનેશ ડેવલપમેન્ટ ઓફિસર રામકૃષ્ણને આ પ્રસંગે જણાવ્યું હતું. ગાંધીનગરના મેયર મીરાંબહેન પટેલે આ બોન્ડના પરિણામે ગાંધીનગરના વિકાસ કામો માટે જનભાગીદારી યુક્ત ભંડોળ ઉપલબદ્ધ થતાં વિકાસની ગતિ વધુ તેજ બનશે એવો વિશ્વાસ વ્યક્ત કર્યો હતો. 

મ્યુનિસિપલ બોન્ડ મેળવનાર ગાંધીનગર મહાનગરપાલિકા દેશની પ્રથમ 20 મહાનગરપાલિકા પૈકી એક હોવાથી, ભારત સરકાર દ્વારા પ્રોત્સાહન તરીકે ગાંધીનગર મહાનગરપાલિકાને આશરે રૂ. 3.25 કરોડની વ્યાજ સબસિડી મળશે, તેમ પણ તેમણે જણાવ્યું હતું. આ બોન્ડ લિસ્ટિંગ અવસરે ડેપ્યુટી મેયર નટવરજી ઠાકોર, સ્ટેન્ડિગ કમિટિ ચેરમેન ગૌરાંગ વ્યાસ, શહેર પ્રમુખ આશિષભાઈ દવે, મ્યુનિસિપલ કમિશનર જે.એન.વાઘેલા, NSEના અધિકારીઓ સહિત મહાનગરપાલિકાના પદાધિકારીઓ, અધિકારીઓ ઉપસ્થિત રહ્યા હતા.