ગુજરાત સ્થાપના દિવસથી સુજલામ સુફલામ જળ અભિયાનનો આરંભ, મુખ્યમંત્રીની જાહેરાત

આગામી 1લી મેના રોજ ગુજરાત સ્થાપના દિવસથી 31 મે સુધી રાજ્ય સરકાર સમગ્ર રાજ્યમાં સુજલામ સુફલામ જળ અભિયાન ચલાવશે. મુખ્યમંત્રી વિજય રુપાણીએ આ અંગે ટવીટ કરીને માહિતી આપી હતી.

1લી મેના રોજ ભરુચ જિલ્લાના અંકલેશ્વર ખાતે આવેલા કોસમડી તળાવ ખાતેથી મુખ્યમંત્રી આ અભિયાનનો આરંભ કરશે. અભિયાનના ભાગરુપ સમગ્ર રાજ્યમાં સ્વૈચ્છિક સંસ્થાઓ, ઉદ્યોગકારો, ધાર્મિક અને શૈક્ષણિક સંસ્થાઓના સહયોગથી જળ સંચયના વિવિધ કામો હાથ ધરવામાં આવશે. 
આ અભિયાન અંતર્ગત તળાવો ઉંડા કરવા, ચેકડેમ અને જળાશયોનું ડિસોલ્ટીંગ, નર્મદા કેનાલ તથા અન્ય નેટવર્કની સફાઈ, તળાવો-નદીના પ્રવાહને અવરોધતા ઝાડી ઝાંખરા દૂર કરવા, સઘન વૃક્ષારોપણ તથા વરસાદી પાણીના સંગ્રહ માટે વિવિધ કાર્યક્રમો હાથ ધરવામાં આવશે.