દ્વારકા જિલ્લાના ઓખામાંથી પોલીસ દ્વારા એક શંકાસ્પદ બોટ ઝડપાઈ

પોલીસે વધુ તપાસ કરતાં બોટના મુસાફર પાસેથી 10 ગ્રામ હેરોઇન મળી આવ્યું.

દ્વારકા જિલ્લા પોલીસે ગત રાત્રિના ઓખાના સિગ્નેચર બ્રિજ નીચેથી એક શંકાસ્પદ બોટ ઝડપી પાડી હતી. આ બોટમાંથી 3 ઈરાની અને 2 ભારતીય સહિત કુલ 5 વ્યક્તિની ધરપકડ કરવામાં આવી છે.

પોલીસે વધુ તપાસ કરતાં બોટના મુસાફર મુસ્તફા ઈરાન પાસેથી 10 ગ્રામ હેરોઇન મળી આવ્યું હતું.  જેની અંદાજિત કિમત આશરે 5 લાખ જેટલી થાય છે. સાથે આ બોટમાંથી સેટેલાઈટ ફોન, GPS સહિત લાખોની ઈરાની ચલણી નોટો પણ જપ્ત કરવામાં આવી છે. આ મામલે આગળની તપાસ SOGને સોંપવામાં આવી છે.

આ ગુના સાથે સંકળાયેલ 2 ભારતીય તમિલનાડુના અશોક કુમાર અને આનંદ કુમાર તેમજ 3 ઈરાની મુસ્તફા, જાશેમ અમીર અને હુશેન સહિત કુલ 5 આરોપીને ઝડપીને કાયદેસરની કાર્યવાહી શરૂ કરાઇ  છે.