પ્રધાનમંત્રીએ સુરત ખાતે 3400 કરોડથી વધુના મૂલ્યના વિવિધ પ્રોજેક્ટનું સમર્પણ કર્યું

• 4 P એટલે પીપલ, પબ્લીક, પ્રાઈવેટ પાર્ટનરશિપ - આ મોડેલ સુરતને ખાસ બનાવે છે
• ડબલ એન્જિન સરકારમાં, વિકાસ કાર્યોની મંજૂરીઓ અને અમલીકરણે અભૂતપૂર્વ ગતિ પ્રાપ્ત કરી છે
• નવી નેશનલ લોજિસ્ટિક પોલિસીથી સુરતને ઘણો ફાયદો થશે
• સુરત ટૂંક સમયમાં ઈલેક્ટ્રિક વાહનો માટે પણ જાણીતું બનશે

પ્રધાનમંત્રી નરેન્દ્ર મોદીએ આજે ​​સુરતમાં 3400કરોડથી વધુના મૂલ્યના વિવિધ પ્રોજેક્ટનો શિલાન્યાસ કર્યો અને સમર્પિત કર્યો. પ્રધાનમંત્રીએ રોડ ઈન્ફ્રાસ્ટ્રક્ચર કામોના તબક્કા-1 અને ડાયમંડ રિસર્ચ એન્ડ મર્કેન્ટાઈલ (ડ્રીમ) સિટીના મુખ્ય પ્રવેશદ્વારનું  તેમજ સાયન્સ સેન્ટર ખાતે ખોજ મ્યુઝિયમનું ઉદ્ઘાટન કર્યું. પ્રધાનમંત્રીએ પ્રોજેક્ટના તબક્કા-2નો શિલાન્યાસ પણ કર્યો હતો. આ સિવાય પ્રધાનમંત્રીએ બાયોડાયવર્સિટી પાર્કનો શિલાન્યાસ કર્યો, જે ડૉ. હેડગેવાર બ્રિજથી ભીમરાડ-બમરોલી બ્રિજ સુધી 87 હેક્ટરથી વધુ વિસ્તારમાં બનાવવામાં આવી રહ્યો છે.  તેમણે સુરતના નાગરિક જીવનમાં બાયોડાયવર્સિટી પાર્કના ફાયદાઓ વિશે વિસ્તારપૂર્વક જણાવ્યું હતું. સભાને સંબોધતા પ્રધાનમંત્રીએ નવરાત્રિના શુભ અવસર પર સુરતમાં બહુવિધ પ્રોજેક્ટ્સનું ઉદ્ઘાટન કરવાની તેમજ આગામી પ્રોજેક્ટનો શિલાન્યાસ કરવાની તક મળતાં આનંદ વ્યક્ત કર્યો હતો.

આ સદીના શરૂઆતના દાયકાઓ દરમિયાનના સમયને યાદ કરીને, જ્યારે 3P એટલે કે પબ્લિક-પ્રાઇવેટ પાર્ટનરશિપની વિશ્વમાં ચર્ચા કરવામાં આવી, પ્રધાનમંત્રીએ ટિપ્પણી કરી હતી કે સુરત 4Pનું ઉદાહરણ છે. “4P એટલે પીપલ, પબ્લીક, પ્રાઈવેટ પાર્ટનરશિપ આ મોડેલ સુરતને ખાસ બનાવે છે,” એમ મોદીએ ઉમેર્યું હતું. ડબલ એન્જિન સરકારની રચના પછીની સકારાત્મક અસરો પર પ્રકાશ પાડતા પ્રધાનમંત્રીએ જણાવ્યું હતું કે, સુરતના ગરીબ અને મધ્યમ વર્ગના પરિવારોને આપવામાં આવતા મકાનો અને અન્ય સુવિધાઓના નિર્માણમાં નોંધપાત્ર વધારો થયો છે. આયુષ્માન ભારત યોજનાથી મેળવેલા લાભોને રેખાંકિત કરતાં, પ્રધાનમંત્રીએ નિર્દેશ કર્યો કે દેશમાં અત્યાર સુધીમાં લગભગ 40 મિલિયન ગરીબ દર્દીઓએ મફત સારવાર મેળવી છે. પ્રધાનમંત્રીએ ઉમેર્યું હતું કે, "32 લાખથી વધુ દર્દીઓ ગુજરાતના છે અને લગભગ 1.25 લાખ સુરતના છે."

લોજિસ્ટિક્સના મહત્વ પર પ્રકાશ પાડતા પ્રધાનમંત્રીએ કહ્યું કે, સુરતના લોકો જાણે છે કે કોઈપણ વ્યવસાય માટે તેનો અર્થ શું છે. રાષ્ટ્રીય લોજિસ્ટિક્સ પોલિસી પર ટિપ્પણી કરતા પ્રધાનમંત્રીએ કહ્યું કે મલ્ટી મોડલ કનેક્ટિવિટી પર એક વિશાળ પ્રોજેક્ટ પર કામ ચાલી રહ્યું છે. હજીરા ઘોઘા રોપેક્સ ફેરી સર્વિસ રોપેક્સ દ્વારા 400 કિમી રોડ અંતર નાટ્યાત્મક રીતે 10-12 કલાકથી 3-4 કલાકમાં ઘટાડી સમય અને નાણાં બંનેની બચત કરી રહી છે. સુરતથી કાશી અને પૂર્વી ઉત્તર પ્રદેશ સુધીની કનેક્ટિવિટીનું ઉદાહરણ આપતાં પ્રધાનમંત્રીએ જણાવ્યું હતું કે માલસામાનની ટ્રકોથી ભરપૂર પરિવહન થાય છે અને હવે રેલવે અને દરિયાકાંઠાના વિભાગોએ શિપમેન્ટની સંખ્યામાં વધારો કરવા માટે અનોખી નવીનતાઓ લાવી છે. પ્રધાનમંત્રીએ સમજાવ્યું કે, “રેલવેએ તેના કોચની ડિઝાઇન એવી રીતે બદલી છે કે તેમાં કાર્ગો સરળતાથી બેસી શકે. આ માટે એક ટનના કન્ટેનર પણ ખાસ બનાવવામાં આવ્યા છે. આ કન્ટેનર સરળતાથી લોડ અને અનલોડ થાય છે. પ્રારંભિક સફળતા બાદ હવે સુરતથી કાશી સુધી નવી ટ્રેન દોડાવવાનો પ્રયાસ કરવામાં આવી રહ્યો છે. આ ટ્રેન સુરતથી કાશી સુધી માલ લઈ જશે. પ્રધાનમંત્રીએ દિલ્હીમાં તત્કાલીન સરકાર પર ટિપ્પણી કરવા માટે ઉતાવળ કરી હતી જેણે શહેરમાં એરપોર્ટની જરૂરિયાત પર વધુ ધ્યાન આપ્યું ન હતું. "આજે જુઓ, અહીંથી કેટલી ફ્લાઈટ્સ ચાલે છે, કેટલા લોકો દરરોજ અહીં ઉતરે છે", પ્રધાનમંત્રીએ એમ પણ ઉમેર્યું હતું. શહેરમાં આંતરમાળખાના વિકાસને રેખાંકિત કરતાં પ્રધાનમંત્રીએ કહ્યું કે શહેરથી એરપોર્ટ સુધીની રોડ કનેક્ટિવિટી સુરતની સંસ્કૃતિ, સમૃદ્ધિ અને આધુનિકતાને દર્શાવે છે. 

પ્રધાનમંત્રીએ સુરતની ડાયમંડ સિટી, બ્રિજ સિટીથી હવે ઈલેક્ટ્રિક વ્હીકલ સિટીની બદલાતી ઓળખ પર ટિપ્પણી કરી હતી. પ્રધાનમંત્રીએ શહેરમાં ઇલેક્ટ્રિક વાહનોના આગમન પર ભાર મૂક્યો હતો અને કહ્યું હતું કે સુરત ખૂબ જ ટૂંક સમયમાં ઇલેક્ટ્રિક વાહનો માટે પણ જાણીતું બનશે. મોદીએ ટીપ્પણી કરી હતી કે અત્યારે, કેન્દ્ર સરકાર દેશભરમાં ઈલેક્ટ્રિક વાહનો ચલાવવા માટે સરકારોને મદદ કરી રહી છે અને દેશના અન્ય શહેરોની સરખામણીમાં સુરત આ બાબતમાં એક પગલું આગળ છે. “આજે સુરત શહેરમાં 25 ચાર્જિંગ સ્ટેશનનું ઉદ્ઘાટન કરવામાં આવ્યું છે અને એટલી જ સંખ્યામાં સ્ટેશનોનો શિલાન્યાસ કરવામાં આવ્યો છે. નજીકના ભવિષ્યમાં સુરતમાં 500 ચાર્જિંગ સ્ટેશન સ્થાપવાની દિશામાં આ એક મોટું પગલું છે.”

સંબોધનના સમાપનમાં, પ્રધાનમંત્રીએ સુરતમાં છેલ્લા બે દાયકાથી વિકાસની ઝડપી ગતિ પર પ્રકાશ ફેંક્યો હતો. પ્રધાનમંત્રીએ ટિપ્પણી કરી હતી કે વિકાસની ગતિ માત્ર આગામી વર્ષોમાં જ વેગવંતી બનશે. “આ વિકાસ આજે ડબલ એન્જિન સરકારમાં વિશ્વાસના સ્વરૂપમાં પ્રતિબિંબિત થાય છે. જ્યારે વિશ્વાસ વધે છે, પ્રયાસ વધે છે અને સબકા પ્રયાસ દ્વારા રાષ્ટ્રના વિકાસની ગતિ ઝડપી બને છે”, એમ પ્રધાનમંત્રીએ ઉમેર્યું હતું. સુરત શહેર લોકોની એકતા અને જનભાગીદારી બંનેનું અદ્ભુત ઉદાહરણ છે. સુરતની સૌથી મોટી વિશેષતા પર પ્રકાશ પાડતા પ્રધાનમંત્રીએ કહ્યું કે આ એક એવું શહેર છે જે શ્રમનું સન્માન કરે છે. "ભારતનો કોઈ પ્રદેશ એવો નહીં હોય કે જેના લોકો સુરતની ધરતી પર રહેતા ન હોય - એક પ્રકારનું મિની હિન્દુસ્તાન."

ગુજરાતના મુખ્યમંત્રી ભૂપેન્દ્ર પટેલ, સંસદ સભ્ય સી આર પાટીલ અને પ્રભુભાઈ વસાવમ, કેન્દ્રીય રાજ્ય મંત્રી, શ્રીમતી દર્શના વિક્રમ જરદોશ અને ગુજરાતના ગૃહમંત્રી હર્ષ સંઘવી આ પ્રસંગે ઉપસ્થિત રહ્યા હતા.