મુખ્યમંત્રી ભૂપેન્દ્ર પટેલે 'સ્વચ્છતા હી સેવા' અભિયાનની કામગીરીની સમીક્ષા માટે ઉચ્ચ સ્તરીય બેઠક યોજી

મુખ્યમંત્રી ભૂપેન્દ્ર પટેલે 'સ્વચ્છતા હી સેવા' અભિયાન અંતર્ગત રાજ્યમાં હાથ ધરાયેલી વિવિધ કામગીરીની સમીક્ષા કરવા ગાંધીનગરમાં ઉચ્ચસ્તરીય બેઠક યોજી હતી.  રાજ્યમાં આગામી બે મહિના સુધી આ અભિયાનને વધુ વ્યાપક બનાવીને સ્વચ્છતા સફાઈ અભિયાન આગળ ધપાવવા દિશાનિર્દેશો આપ્યા હતા. મુખ્યમંત્રીએ આ સંદર્ભમાં શહેરી વિકાસ વિભાગ અને પંચાયત તથા ગ્રામ વિકાસ વિભાગ તેમ જ અન્ય સંબંધિત વિભાગોને આગામી આઠ સપ્તાહ દરમિયાન દર રવિવારે થીમ આધારિત સફાઈ સ્વચ્છતા કાર્યક્રમો યોજવા સૂચન કર્યું હતું.

આ સમીક્ષા બેઠકમાં જણાવવામાં આવ્યું હતું કે રાજ્યનાં 18 હજાર ગામોમાં 2.67 લાખથી વધુ કાર્યક્રમો યોજીને અંદાજે 3.92 કરોડ લોકોની જનભાગીદારીથી ગાર્બેજ-ફ્રી ભારતની નેમ પાર પાડવામાં આવી છે. એટલું જ નહીં, શહેરી ક્ષેત્રોમાં 26 હજારથી વધુ વિસ્તારોમાં લાખો લોકોની સહભાગીતાથી સફાઈ અભિયાન કરવામાં આવ્યું હતું. તેમણે આ અંગે વધુમાં કહ્યું કે સરકારી વસાહતો, કચેરીઓ, જાહેર સ્થળો, સાથે વોટરબોડીઝની સાફસફાઈને પણ સાંકળી લેવાનું આયોજન કરાશે.

રાજ્યનાં મહાનગરોમાં પ્રવેશમાર્ગોની હદથી પાંચ કિલોમીટર સુધીનો વિસ્તાર, નગર પાલિકા વિસ્તારમાં પ્રવેશમાર્ગોની હદથી 2 કિલોમીટર સુધીનો વિસ્તાર તેમ જ ગ્રામ વિસ્તારોમાં મુખ્ય રસ્તા, હાઈવેને જોડતાં મુખ્ય માર્ગોની ગ્રામ પંચાયતો દ્વારા દર રવિવારે અવશ્ય સાફસફાઈ થાય તેવી સૂચનાઓ પણ મુખ્યમંત્રીએ આપી હતી. મુખ્યમંત્રી ભૂપેન્દ્ર પટેલે શાળા-કોલેજો, જાહેર સ્થાનોની, રોજબરોજની સાફસફાઈ ઉપરાંત વધુ પ્રમાણમાં કચરો એકત્ર થતો હોય તેવાં સ્થળોની સફાઈ અને લીગસી વેસ્ટના યોગ્ય નિકાલ માટે પણ માર્ગદર્શન આપ્યું હતું.