લોકસભાની ચૂંટણી પહેલા કોંગ્રેસને વધુ એક ઝટકો, સી.જે.ચાવડાએ ધારાસભ્ય પદેથી રાજીનામું આપ્યું

મહેસાણા જિલ્લાની વિજાપુર વિધાનસભા બેઠકના ધારાસભ્ય હતા.

લોકસભાની ચૂંટણી પહેલા કોંગ્રેસને વધુ એક ઝટકો લાગ્યો છે. સી.જે.ચાવડાએ ધારાસભ્ય પદેથી રાજીનામું આપી દીધું છે. મહેસાણા જિલ્લાની વિજાપુર વિધાનસભા બેઠકના ધારાસભ્ય હતા. સી.જે.ચાવડા સવારે વિધાનસભાના અધ્યક્ષ શંકર ચૌધરીને મળવા પહોંચ્યા અને ધારાસભ્ય પદેથી રાજીનામું આપ્યું હતું. સી જે ચાવડા છેલ્લા 25 વર્ષથી કોંગ્રેસ સાથે જોડાયેલા હતા.

સી.જે.ચાવડા રાજ્ય સરકારમાં પશુપાલન વિભાગના અધિકારી રહી ચૂક્યા છે, પૂર્વ મુખ્યમંત્રી શંકરસિંહ વાઘેલાની સલાહથી સરકારી નોકરી છોડીને કોંગ્રેસમાં જોડાયા હતા. વર્ષ 2002ની વિધાનસભા ચૂંટણીમાં ગાંધીનગરની બેઠક પરથી ભાજપના નેતા વાડીભાઇ પટેલને હરાવીને ધારાસભ્ય બન્યા હતા, ત્યારબાદ 2017માં ગાંધીનગર ઉત્તર અને 2022માં વિજાપુર બેઠક પરથી તેઓ કોંગ્રેસના ધારાસભ્ય તરીકે ચૂંટાયા હતા.તેમના રાજીનામાથી વિધાનસભામાં કોંગ્રેસના ધારાસભ્યોની સંખ્યા 15 પર  પહોંચી છે.