વલસાડના ભાગલ ગામે પૌરાણિક બળદગાડા-રેસ યોજાઈ, 8 સ્પર્ધકોએ લીધો ભાગ

વલસાડ જિલ્લાના ભાગલ ગામ ખાતે પૌરાણિક બળદગાડા-રેસનું આયોજન કરવામાં આવ્યું હતું. આ રેસનો હેતુ પરંપરા અને ધરોહરને જાળવી રાખવા તથા નવી પેઢીને બળદગાડા અંગે જાણકારી આપવાનો હતો

હાલના સ્માર્ટ યુગમાં આજના યુવાનો મોબાઇલ અને ઇન્ટરનેટની ટેકનોલોજીમાં વ્યસ્ત રહે છે ત્યારે વલસાડ તાલુકાના ભાગલ ગામમાં સ્થાનિક યુવકો અને ગામના અગ્રણીઓ દ્વારા પરંપરાગત બળદગાડા રેસનું આયોજન કરવામાં આવ્યું હતું. આ રેસનું આયોજન છેલ્લા 5 વર્ષથી ધુળેટી પર્વ નિમિત્તે કરવામાં આવે છે. જેમાં આઠ જેટલા સ્થાનિક લોકોએ બળદગાડા સાથે રેસમાં ભાગ લીધો હતો... પોતાની પરંપરા અને સ્થાનિક ખેડૂતો યુવકો દ્વારા પોતાની આ ધરોહરને જાળવી રાખવા અને સાથે જ નવી પેઢીને આ બળદગાડા અંગે જાણકારી મળી શકે તે હેતુસર આ રેસનું આયોજન કરવામાં આવ્યું હતું... સાથે જ બળદગાડા રેસમાં વિજેતાને ટ્રોફી અને ઇનામ પણ એનાયત કરવામાં આવ્યા હતા...

પારંપરિક સંસ્કૃતિને જીવંત રાખવાનો અનોખો પ્રયાસ

આધુનિક યુગમાં યુવાનો અને બાળકો મોબાઇલ અને ઇન્ટરનેટની દુનિયામાં વ્યસ્ત રહે છે. આ સમયે ગ્રામ્ય કક્ષાએ યુવાનો અને બાળકોમાં બળદગાડાનું મહત્ત્વ સમજાવવાનો આ એક પ્રયાસ છે. સ્થાનિક પરંપરા અને ખેડૂત સંસ્કૃતિને જીવંત રાખવાનો આ અનોખો પ્રયાસ છે.

આ રેસ જોવા માટે આજુબાજુના ગામના લોકો મોટી સંખ્યામાં ઉપસ્થિત રહ્યા હતા. સ્પર્ધકો પાસેથી કોઈ એન્ટ્રી ફી લેવામાં આવી ન હતી. સ્પર્ધાના અંતે વિજેતા અને રનર-અપ સ્પર્ધકોને ગામના અગ્રણીઓના હસ્તે ટ્રોફી અને રોકડ ઇનામ આપવામાં આવ્યા. આ રીતે નવી પેઢીને પરંપરાગત ખેતી સંસ્કૃતિથી પરિચિત કરાવવાનો પ્રયાસ કરવામાં આવ્યો હતો.