વિરમગામમાં વહીવટી તંત્રની મોટી કાર્યવાહી: ટ્રાફિક સમસ્યા નિવારવા બુલડોઝર ફર્યા

વિરમગામમાં વહીવટી તંત્રની મોટી કાર્યવાહી: ટ્રાફિક સમસ્યા નિવારવા બુલડોઝર ફર્યા

વિરમગામ શહેરમાં લાંબા સમયથી માથાના દુખાવા સમાન બનેલી ટ્રાફિકની સમસ્યાના કાયમી નિરાકરણ અને માર્ગોને પહોળા કરવા માટે વહીવટી તંત્ર દ્વારા કડક વલણ અપનાવવામાં આવ્યું છે. શહેરના મુખ્ય પ્રવેશદ્વાર પર નડતરરૂપ સાંકડા માર્ગો અને ગેરકાયદેસર બાંધકામોને હટાવવા માટે આજે સવારથી જ વ્યાપક સ્તરે ડિમોલિશન (બાંધકામ તોડી પાડવાની) કામગીરી શરૂ કરી દેવામાં આવી છે. તંત્રની આ આકરી કાર્યવાહીથી ગેરકાયદેસર દબાણ કરનારાઓમાં ફફડાટ વ્યાપી ગયો છે.

વળતર ચૂકવીને ખાનગી અને કબ્રસ્તાનની જમીનનો કબજો લેવાયો

આ મેગા પ્રોજેક્ટ અને ડિમોલિશન અંગે વિગત આપતા સબ-ડિવિઝનલ મેજિસ્ટ્રેટ (SDM) વીરેન્દ્ર દેસાઈએ જણાવ્યું હતું કે, રોડ વાઇડનિંગ (માર્ગ પહોળો કરવા)ની આ પ્રક્રિયા કાયદાકીય જોગવાઈઓ હેઠળ શાંતિપૂર્ણ રીતે પૂર્ણ કરવામાં આવી રહી છે. રસ્તામાં નડતરરૂપ જમીન સંપાદન માટે  જમીન સંપાદન કાયદા હેઠળ યોગ્ય નિયમોનુસાર અંદાજે 1200 ચોરસ મીટર ખાનગી જમીનનું વળતર ચૂકવીને તંત્ર દ્વારા તેનો સત્તાવાર કબજો લેવામાં આવ્યો છે. આ સાથે જ પ્રોજેક્ટની જરૂરિયાતને ધ્યાનમાં રાખીને પરસ્પર સંમતિથી 2300 ચોરસ મીટર જેટલી કબ્રસ્તાનની જમીન પણ માર્ગ પહોળો કરવા માટે પ્રાપ્ત કરવામાં આવી છે.

ટ્રાફિકની જટિલ સમસ્યાનો આવશે કાયમી ઉકેલ

વિરમગામના પ્રવેશદ્વાર પર સાંકડો રસ્તો હોવાના કારણે પીક અવર્સ (વ્યસ્ત સમય) દરમિયાન દરરોજ કલાકો સુધી ટ્રાફિક જામની સ્થિતિ સર્જાતી હતી. વાહનચાલકો અને સ્થાનિક વેપારીઓ વર્ષોથી આ સમસ્યાથી પરેશાન હતા.

વહીવટી તંત્રની આ ત્વરિત અને કડક કાર્યવાહીથી વિરમગામના પ્રવેશદ્વારના માર્ગો હવે વધુ પહોળા અને સુવિધાયુક્ત બનશે. જેનાથી ટ્રાફિકની સમસ્યાનો કાયમી અંત આવશે અને શહેરની આસપાસની કનેક્ટિવિટીમાં નોંધપાત્ર સુધારો જોવા મળશે.

આજના આ ડિમોલિશન કાર્યક્રમ દરમિયાન કાયદો અને વ્યવસ્થા જળવાઈ રહે તે માટે મોટી સંખ્યામાં પોલીસ કાફલો અને વહીવટી અધિકારીઓ ઘટનાસ્થળે તૈનાત રહ્યા હતા.