સ્ટેચ્યૂ ઓફ યુનિટી બાદ જંગલ સફારી બની પ્રવાસીઓનું સૌથી મોટું આકર્ષણ

નર્મદા જિલ્લાના કેવડિયા ખાતે જંગલ સફારી પ્રવાસીઓ માટે આકર્ષણનું કેન્દ્ર બન્યું છે. 375 એકર વિસ્તારમાં ફેલાયેલું આ પાર્ક દેશનું સૌથી મોટું જંગલ સફારી માનવામાં આવે છે. અહીં પ્રવાસીઓ પાંજરા વગર ખુલ્લામાં ફરતા દેશી તથા વિદેશી પ્રાણીઓને નિહાળી શકે છે. આ અનુભવ બાળકો અને પરિવાર માટે વિશેષ રોમાંચક બની રહ્યો છે. 

સ્નેક હાઉસ અને નવા મહેમાનોનું આકર્ષણ

તાજેતરમાં જંગલ સફારીમાં વિશાળ ડોમમાં આધુનિક સ્નેક હાઉસ શરૂ કરવામાં આવ્યું છે, જે પ્રવાસીઓ માટે નવીન આકર્ષણ બન્યું છે. અનુકૂળ વાતાવરણ મળતાં અનેક પશુ-પક્ષીઓએ અહીં બચ્ચાંને જન્મ આપ્યો છે. આ નવા મહેમાનોને જોવા માટે મોટી સંખ્યામાં સહેલાણીઓ આવી રહ્યા છે. ખાસ કરીને બાળકો માટે આ અનુભવ આનંદ અને જ્ઞાન બંને આપે છે.

દર વર્ષે ઉમેરાતા નવા આકર્ષણો

નર્મદા જિલ્લાને વૈશ્વિક ઓળખ અપાવનાર સ્ટેચ્યૂ ઓફ યુનિટી પાસે આવેલી જંગલ સફારીમાં દર વર્ષે નવા આકર્ષણો ઉમેરવામાં આવી રહ્યા છે. સફારીના વિકાસને કારણે પ્રવાસીઓ ફરી ફરી અહીં આવવાનું પસંદ કરે છે. સંચાલન દ્વારા પ્રવાસીઓ માટે સુવિધાઓમાં પણ સતત વધારો કરવામાં આવી રહ્યો છે. પરિણામે જંગલ સફારી પ્રવાસન નકશા પર વધુ મજબૂત બની છે.