ડિજીલોકર: યુઝર્સ ડિજીટલ રીતે હેલ્થ રેકોર્ડ સ્ટોર કરી શકશે અને તેને આયુષ્માન ભારત હેલ્થ એકાઉન્ટ સાથે લિંક કરી શકશે

ડિજીલોકર, ઈલેક્ટ્રોનિક્સ અને ઈન્ફોર્મેશન ટેક્નોલોજી મંત્રાલય હેઠળના અધિકૃત દસ્તાવેજોના વિનિમય પ્લેટફોર્મે આયુષ્માન ભારત ડિજિટલ મિશન (ABDM) સાથે તેના બીજા-સ્તરના એકીકરણને સફળતાપૂર્વક પૂર્ણ કર્યું છે. ડિજીલોકરના સુરક્ષિત ક્લાઉડ-આધારિત સ્ટોરેજ પ્લેટફોર્મનો ઉપયોગ હવે આરોગ્ય રેકોર્ડ્સ જેમ કે રસીકરણ રેકોર્ડ્સ, ડૉક્ટર પ્રિસ્ક્રિપ્શન્સ, લેબ રિપોર્ટ્સ, હોસ્પિટલ ડિસ્ચાર્જ સમરી વગેરેને સ્ટોર કરવા અને ઍક્સેસ કરવા માટે હેલ્થ લોકર તરીકે થઈ શકે છે.

ડિજીલોકરએ અગાઉ ABDM સાથે લેવલ 1 એકીકરણ પૂર્ણ કર્યું હતું. જેમાં પ્લેટફોર્મે તેના 13 કરોડ વપરાશકર્તાઓ માટે આયુષ્માન ભારત હેલ્થ એકાઉન્ટ બનાવવાની સુવિધા ઉમેરી હતી. નવીનતમ સંકલન હવે વપરાશકર્તાઓને વ્યક્તિગત આરોગ્ય રેકોર્ડ્સ (PHR) એપ્લિકેશન તરીકે ડિજીલોકરનો ઉપયોગ કરવા સક્ષમ બનાવશે. આ ઉપરાંત, આયુષ્માન ભારત હેલ્થ એકાઉન્ટ(ABHA) ધારકો તેમના આરોગ્ય રેકોર્ડને અલગ-અલગ ABDM રજિસ્ટર્ડ આરોગ્ય સુવિધાઓ જેવી કે હોસ્પિટલો અને લેબમાંથી પણ લિંક કરી શકે છે અને તેને ડિજીલોકર દ્વારા એક્સેસ કરી શકે છે. યુઝર્સ એપ પર તેમના જૂના હેલ્થ રેકોર્ડને સ્કેન કરીને અપલોડ પણ કરી શકે છે. વધુમાં, તેઓ ABDM રજિસ્ટર્ડ હેલ્થકેર પ્રોફેશનલ્સ સાથે પસંદ કરેલા રેકોર્ડ શેર કરી શકે છે.

વપરાશકર્તાઓ માટે આ એકીકરણના ફાયદા પર પ્રકાશ પાડતા, ડૉ. આર.એસ. શર્મા, CEO, નેશનલ હેલ્થ ઓથોરિટી (NHA)એ કહ્યું – “ABDM હેઠળ, અમે આંતર-સંચાલિત સ્વાસ્થ્ય ઇકોસિસ્ટમ બનાવી રહ્યા છીએ. ABDM સાથે સંકલિત જાહેર અને ખાનગી બંને ક્ષેત્રના ભાગીદારોની વિવિધ એપ્લિકેશનો વધુ વપરાશકર્તાઓ સુધી યોજનાની પહોંચને વિસ્તૃત કરવામાં અને વધુ કાર્યક્ષમતા ઉમેરવામાં મદદ કરી રહી છે. ડીજીલોકર અધિકૃત દસ્તાવેજો ઍક્સેસ કરવા માટે એક વિશ્વસનીય અને લોકપ્રિય એપ્લિકેશન છે. તેથી, તે એક નોંધપાત્ર વિકાસ છે કારણ કે વપરાશકર્તાઓ હવે તેનો ઉપયોગ PHR એપ્લિકેશન તરીકે કરી શકશે અને પેપરલેસ રેકોર્ડ રાખવાના ફાયદા મેળવશે."

એકીકરણ વિશે અભિષેક સિંઘ, (MD અને CEO) ડિજિટલ ઈન્ડિયા કોર્પોરેશને કહ્યું – “અમને અમારા 130 મિલિયન નોંધાયેલા વપરાશકર્તાઓ સુધી ABDMના લાભો પહોંચાડવામાં ગર્વ છે. પ્લેટફોર્મ પહેલાથી જ લગભગ 85 હજાર ABHA નંબર જનરેટ કરવામાં મદદ કરી ચુક્યું છે. હેલ્થ લોકર એકીકરણ સાથે, અમે હકારાત્મક છીએ કે વધુ લોકો તેમના આરોગ્ય રેકોર્ડને ડિજિટલ રીતે સરળતાથી લિંક અને મેનેજ કરી શકશે. ડિજીલોકરએ ABHA વપરાશકર્તાઓ માટે પસંદગીનું આરોગ્ય લોકર બનવાનું લક્ષ્ય રાખે છે."

આરોગ્ય લોકર સેવાઓ હવે ડિજીલોકરના તમામ નોંધાયેલા વપરાશકર્તાઓ માટે ઉપલબ્ધ છે.