અમેરિકા ડબ્લ્યુએચઓથી અલગ થયુ, કોરોના સમયની નિષ્ફળતાઓનો આરોપ

અમેરિકાએ ઔપચારિક રીતે વિશ્વ આરોગ્ય સંસ્થા (ડબ્લ્યુએચઓ)માંથી પોતાની સભ્યતા સમાપ્ત કરી દીધી છે. ટ્રમ્પ પ્રશાસને જણાવ્યું છે કે આ નિર્ણય રાષ્ટ્રપતિ ડોનાલ્ડ ટ્રમ્પે પોતાના પ્રથમ દિવસે કરેલા વચનને પૂર્ણ કરવા માટે લેવામાં આવ્યો છે

અમેરિકાએ ઔપચારિક રીતે વિશ્વ આરોગ્ય સંસ્થા (ડબ્લ્યુએચઓ)માંથી પોતાની સભ્યતા સમાપ્ત કરી દીધી છે. ટ્રમ્પ પ્રશાસને જણાવ્યું છે કે આ નિર્ણય રાષ્ટ્રપતિ ડોનાલ્ડ ટ્રમ્પે પોતાના પ્રથમ દિવસે કરેલા વચનને પૂર્ણ કરવા માટે લેવામાં આવ્યો છે.વિદેશ મંત્રી માર્કો રૂબિયો અને આરોગ્ય તથા માનવ સેવા મંત્રી રોબર્ટ એફ. કેનેડી જુનિયરે સંયુક્ત નિવેદનમાં જણાવ્યું કે રાષ્ટ્રપતિ ટ્રમ્પ દ્વારા હસ્તાક્ષર કરાયેલા એક કાર્યકારી આદેશ દ્વારા આ પાછા ખેંચવાનો નિર્ણય અમલમાં મૂકવામાં આવ્યો છે. આ નિર્ણયનો હેતુ અમેરિકાને ડબ્લ્યુએચઓની ‘પ્રતિબંધોમાંથી મુક્ત કરવો તથા કોરોના મહામારી દરમિયાન થયેલી નિષ્ફળતાઓથી થયેલા નુકસાનની ભરપાઈ કરવાનો છે.

નિવેદનમાં કહેવામાં આવ્યું છે કે, “આજે અમેરિકા વિશ્વ આરોગ્ય સંસ્થાથી પોતાને અલગ કરી રહ્યું છે, જેમ રાષ્ટ્રપતિ ટ્રમ્પે પોતાના પ્રથમ દિવસે વચન આપ્યું હતું. કોરોના મહામારી દરમિયાન ડબ્લ્યુએચઓની નિષ્ફળતાઓના જવાબરૂપે આ પગલું લેવામાં આવ્યું છે, જેના પરિણામે અમેરિકન જનતાને ભારે નુકસાન ભોગવવું પડ્યું હતું.”

પ્રશાસને ડબ્લ્યુએચઓ પર પોતાના મૂળ ઉદ્દેશ્યથી ભટકી જવાનો અને અમેરિકાના હિતો સામે કામ કરવાનો આરોપ લગાવ્યો છે. નિવેદનમાં કહેવામાં આવ્યું છે કે અમેરિકા ડબ્લ્યુએચઓનું સ્થાપક સભ્ય અને સૌથી મોટું નાણાકીય યોગદાન આપનાર દેશ રહ્યું છે, છતાં સંસ્થાએ અમેરિકાના હિતોની અવગણના કરી છે.ટ્રમ્પ પ્રશાસનનો દાવો છે કે ડબ્લ્યુએચઓએ રાજકીય અને નોકરશાહી એજન્ડાને અપનાવ્યો, જે એવા દેશોથી પ્રભાવિત હતો જે અમેરિકાના વિરોધી છે. ઉપરાંત, મહામારી દરમિયાન સમયસર અને ચોક્કસ માહિતી વહેંચવામાં સંસ્થા નિષ્ફળ રહી હતી.

નિવેદનમાં વધુમાં જણાવાયું છે કે આ નિષ્ફળતાઓના કારણે અમેરિકન લોકોના જીવ જઈ શક્યા હોત અને બાદમાં આ ભૂલોને ‘જાહેર આરોગ્યના હિત’ના નામે છુપાવવામાં આવી હતી.પ્રશાસને આક્ષેપ કર્યો છે કે અમેરિકા બહાર નીકળવાના નિર્ણય બાદ ડબ્લ્યુએચઓનું વર્તન અપમાનજનક રહ્યું. કહેવામાં આવ્યું છે કે સંસ્થાએ પોતાના મુખ્યાલયમાં લાગેલું અમેરિકન ધ્વજ સોંપવાનો ઇનકાર કર્યો અને એવો દાવો કર્યો કે તેણે અમેરિકાની પાછી ખેંચવાની પ્રક્રિયાને મંજૂરી આપી નથી.

સંયુક્ત નિવેદનમાં કહેવામાં આવ્યું છે કે, “સ્થાપક સભ્ય અને સૌથી મોટા સમર્થક હોવા છતાં, છેલ્લાં દિવસ સુધી અમેરિકા સાથે અપમાનજનક વર્તન ચાલુ રહ્યું.”અમેરિકી સરકારે સ્પષ્ટ કર્યું છે કે હવે ડબ્લ્યુએચઓ સાથેનો સંપર્ક માત્ર પાછી ખેંચવાની પ્રક્રિયા પૂર્ણ કરવા અને અમેરિકન નાગરિકોના આરોગ્ય તથા સુરક્ષાની રક્ષા પૂરતો જ સીમિત રહેશે. ડબ્લ્યુએચઓ સાથે જોડાયેલી તમામ અમેરિકી ફંડિંગ અને સ્ટાફિંગ તાત્કાલિક બંધ કરી દેવામાં આવી છે.

પ્રશાસને જણાવ્યું છે કે હવે અમેરિકા વૈશ્વિક આરોગ્ય પ્રયાસોનું નેતૃત્વ સીધું અન્ય દેશો સાથે દ્વિપક્ષીય ભાગીદારી અને વિશ્વસનીય આરોગ્ય સંસ્થાઓ મારફતે કરશે. નિવેદનમાં ડબ્લ્યુએચઓને ભારે-ભરખમ અને અક્ષમ નોકરશાહી તરીકે વર્ણવવામાં આવી છે.ટ્રમ્પ પ્રશાસને જણાવ્યું છે કે આ નિર્ણય તે અમેરિકન નાગરિકોને સન્માન આપવા માટે લેવામાં આવ્યો છે જેમણે મહામારી દરમિયાન પોતાના સ્વજનો ગુમાવ્યા, ખાસ કરીને નર્સિંગ હોમમાં મૃત્યુ પામેલા વૃદ્ધો અને તે વેપારીઓ જેમને કોરોના પ્રતિબંધોના કારણે ભારે નુકસાન થયું હતું.

ઉલ્લેખનીય છે કે અમેરિકા વર્ષ 1948માં ડબ્લ્યુએચઓનું સ્થાપક સભ્ય બન્યું હતું અને લાંબા સમય સુધી સંસ્થાનો સૌથી મોટો દાતા રહ્યો છે.