ભારત-બાંગ્લાદેશ મૈત્રી પાઇપલાઇનનું બંને દેશો વચ્ચે જોડાણ વધારવાનું ઉત્તમ ઉદાહરણ: પ્રધાનમંત્રી નરેન્દ્ર મોદી

પ્રધાનમંત્રી નરેન્દ્ર મોદીએ અને બાંગ્લાદેશના પ્રધાનમંત્રી શેખ હસીનાએ સંયુક્તપણે ભારત-બાંગ્લાદેશ મૈત્રી પાઇપલાઇનનું વર્ચ્યુઅલ ઉદ્ઘાટન કર્યું હતું.

આ પ્રસંગે પ્રધાનમંત્રી મોદીએ સંબોધમ આપતા કહ્યું હતું કે, આજે ભારત-બાંગ્લાદેશ સંબંધોમાં એક નવો અધ્યાય શરૂ થયો છે. ભારત-બાંગ્લાદેશ મિત્રતા પાઈપલાઈન અમે સપ્ટેમ્બર 2018માં તેનો પાયો નાખ્યો હતો. અને મને ખુશી છે કે આજે પ્રધાનમંત્રી શેખ હસીના સાથે તેનું ઉદ્ઘાટન કરવાની તક મળી છે.

એ પણ સંતોષની વાત છે કે કોવિડ રોગચાળા છતાં આ પ્રોજેક્ટ પર કામ ચાલુ રહ્યું. આ પાઈપલાઈન દ્વારા ઉત્તર બાંગ્લાદેશના વિવિધ જિલ્લાઓમાં 1 મિલિયન મેટ્રિક ટન હાઈ-સ્પીડ ડીઝલની સપ્લાઈ કરી શકાશે. પાઈપલાઈન દ્વારા સપ્લાય કરવાથી માત્ર ખર્ચમાં ઘટાડો થશે નહીં, પરંતુ આ સપ્લાયના કાર્બન ફૂટપ્રિન્ટમાં પણ ઘટાડો થશે. વિશ્વસનીય અને ખર્ચ-અસરકારક ડીઝલ પુરવઠો ખાસ કરીને કૃષિ ક્ષેત્ર માટે ફાયદાકારક રહેશે. સ્થાનિક ઉદ્યોગોને પણ તેનો લાભ મળશે.

આજની વૈશ્વિક પરિસ્થિતિમાં ઘણી વિકાસશીલ અર્થવ્યવસ્થાઓ તેમની ખાદ્ય અને ઉર્જા સુરક્ષા સુનિશ્ચિત કરવા માટે સંઘર્ષ કરી રહી છે. આ સંદર્ભમાં આજની ઘટનાનું મહત્વ પણ વધારે છે.
 
વધુમાં પ્રધાનમંત્રી મોદીએ જણાવ્યું હતું કે, છેલ્લા કેટલાક વર્ષોમાં, પ્રધાનમંત્રી શેખ હસીનાના સક્ષમ નેતૃત્વ હેઠળ, બાંગ્લાદેશે નોંધપાત્ર પ્રગતિ કરી છે. દરેક ભારતીયને આ વાત પર ગર્વ છે. અને અમને પણ ખુશી છે કે અમે બાંગ્લાદેશની આ વિકાસ યાત્રામાં યોગદાન આપી શક્યા છીએ. મને ખાતરી છે કે આ પાઈપલાઈન બાંગ્લાદેશના વિકાસને વધુ વેગ આપશે અને બંને દેશો વચ્ચે જોડાણ વધારવાનું ઉત્તમ ઉદાહરણ પણ બની રહેશે. તે જરૂરી છે કે આપણે આપણી કનેક્ટિવિટીના દરેક સ્તંભને મજબૂત કરતા રહીએ. ભલે તે પરિવહન ક્ષેત્રે હોય, ઉર્જા ક્ષેત્રે હોય, વીજળી ક્ષેત્રે હોય કે પછી ડિજિટલ ક્ષેત્રે હોય. આપણી કનેક્ટિવિટી જેટલી વધુ વધશે તેટલા જ આપણા લોકો-લોકોના સંબંધો વધુ મજબૂત થશે.

મને યાદ છે કે ઘણા વર્ષો પહેલા વડાપ્રધાન શેખ હસીનાએ 1965 પહેલાની રેલ કનેક્ટિવિટી પુનઃસ્થાપિત કરવાના તેમના વિઝન વિશે વાત કરી હતી. અને ત્યારપછી બંને દેશોએ સાથે મળીને આ અંગે ઘણી પ્રગતિ કરી છે. આના પરિણામે, કોવિડ રોગચાળા દરમિયાન, અમે રેલ નેટવર્ક દ્વારા બાંગ્લાદેશમાં ઓક્સિજન વગેરે મોકલી શક્યા. હું પ્રધાનમંત્રી શેખ હસીના જીને તેમની આ દૂરંદેશી દ્રષ્ટિ માટે હૃદયપૂર્વક અભિનંદન આપું છું.

તથા વીજળીના ક્ષેત્રમાં અમારો પરસ્પર સહયોગ ખૂબ જ સફળ રહ્યો છે. આજે ભારત બાંગ્લાદેશને 1,100 મેગાવોટથી વધુ વીજળી સપ્લાય કરી રહ્યું છે. મૈત્રી સુપર થર્મલ પાવર પ્લાન્ટનું પ્રથમ યુનિટ પણ કાર્યરત થઈ ગયું છે. ગયા વર્ષે પ્રધાનમંત્રી શેખ હસીનાની ભારત મુલાકાત દરમિયાન અમારા દ્વારા તેનું ઉદ્ઘાટન કરવામાં આવ્યું હતું. અને હવે અમે ટૂંક સમયમાં બીજા યુનિટને શરૂ કરવાની દિશામાં કામ કરી રહ્યા છીએ.

જ્યાં સુધી ઉર્જા સહયોગની વાત છે, અમારો પેટ્રોલિયમ વેપાર $1 બિલિયનને વટાવી ગયો છે. તે આનંદની વાત છે કે અમારો સહયોગ હાઇડ્રોકાર્બનની સમગ્ર મૂલ્ય શૃંખલામાં છે. પછી ભલે તે અપ-સ્ટ્રીમ હોય, અથવા મિડ-સ્ટ્રીમ અથવા ડાઉન-સ્ટ્રીમ. આ પાઈપલાઈન સાથે આ સહયોગ વધુ વ્યાપક બનશે.

પ્રધાનમંત્રીએ નુમાલીગઢ રિફાઈનરી અને બાંગ્લાદેશ પેટ્રોલિયમ કોર્પોરેશનને અભિનંદન આપતા કહ્યું કે, કેવો શુભ સંયોગ છે કે આજે ઉદ્ઘાટન બંગબંધુ શેખ મુજીબુર રહેમાનની જન્મજયંતિના એક દિવસ પછી થઈ રહ્યું છે! બંગબંધુના 'શોનાર બાંગ્લા' વિઝનમાં સમગ્ર પ્રદેશના સુમેળભર્યા વિકાસ અને સમૃદ્ધિનો સમાવેશ થતો હતો. આ સંયુક્ત પ્રોજેક્ટ તેમના વિઝનનું ઉત્તમ ઉદાહરણ છે.

તમારા માર્ગદર્શનથી ભારત-બાંગ્લાદેશ સહયોગના દરેક પાસાઓને ફાયદો થયો છે. આ પ્રોજેક્ટ પણ તેમાં સામેલ છે. આ ઇવેન્ટમાં મારી સાથે જોડાવા બદલ તમારો ખૂબ ખૂબ આભાર. અને આ પ્રોજેક્ટનો લાભ મેળવનાર તમામ લોકોને ખૂબ ખૂબ અભિનંદન.