અમદાવાદને કલ્ચર એન્ડ ઈન્ટીગ્રેટેડ કમાન્ડ એન્ડ કંટ્રોલ સેન્ટર માટે મળ્યો એવોર્ડ

સ્માર્ટ સિટીઝ એવોર્ડની જાહેરાત, 66 શહેરોને સન્માન, અમદાવાદ અને વડોદરાને આ શ્રેણીમાં મળ્યો એવોર્ડ

ભારત સરકારના મિનિસ્ટ્રી ઓફ હાઉસીંગ એન્ડ અર્બન અફેર્સ MoHUA તરફથી વર્ચુઅલ માધ્યમથી Indian Smart City Contest (ISAC) 2022 ના વિજેતાઓની જાહેરાત કરવામાં આવેલ છે.  કોન્ફરન્સમાં સ્માર્ટ સિટી મિશન ડાયરેક્ટર અને જોઈન્ટ સેક્રેટરી કૃણાલ કુમારની અધ્યક્ષતા હેઠળ વિવિધ કેટેગરીમાં એવોર્ડસની જાહેરાત કરેલ છે, જેમાં વિવિધ 100 સ્માર્ટ સિટીના ચીફ અક્ઝીક્યુટીવ ઓફિસરઓ અને અન્ય અધિકારીઓ ઉપસ્થિત રહ્યા હતા. 
 
ભારત સરકારના મિનિસ્ટ્રી ઓફ હાઉસીંગ એન્ડ અર્બન અફેર્સ MoHUA દ્વારા ISAC 2022 અંતર્ગત વિવિધ કેટેગરીમાં આવેલ નોમિનેશન્સનું તબક્કાવાર ઈવેલ્યુએશન કર્યા બાદ વિવિધ કેટેગરીમાં વિજેતાઓની જાહેરાત કરવામાં આવેલ હતી, જેમાં સ્માર્ટ સિટી અમદાવાદને નીચે મુજબ ચાર એવોર્ડ એનાયત કરવામાં આવેલ છે. 

આવાસ અને શહેરી બાબતોના મંત્રાલયએ આજે સ્માર્ટ સિટીઝ મિશન હેઠળ ઇન્ડિયા સ્માર્ટ સિટીઝ એવોર્ડ કોમ્પિટિશનની જાહેરાત કરી હતી. જેમાં વિવિધ કેટેગરીમાં 66 વિજેતાઓનું સન્માન કરવામાં આવ્યું હતું. ઈન્દોરે નેશનલ સ્મોલ સિટી એવોર્ડ જીત્યો, જ્યારે મધ્ય પ્રદેશે સ્ટેટ એવોર્ડ અને ચંદીગઢને યુટી એવોર્ડ મળ્યો. ISAC 2022 માટે 80 યોગ્ય સ્માર્ટ સિટીમાંથી કુલ 845 નોમિનેશન પ્રાપ્ત થયા હતા. તેમાંથી 66 ફાઇનલિસ્ટને પાંચ એવોર્ડ કેટેગરી હેઠળ ઓળખવામાં આવ્યા છે. જેમાંથી 35 પ્રોજેક્ટ એવોર્ડમાં, છ ઇનોવેશન એવોર્ડમાં, 13 નેશનલ/ઝોનલ સિટી એવોર્ડમાં, પાંચ સ્ટેટ/યુટી એવોર્ડમાં અને સાત પાર્ટનર એવોર્ડ કેટેગરીમાં છે.

બિલ્ટ એન્વાયર્નમેન્ટ માટે કોઈમ્બતુરને ટોચનું સ્થાન મળ્યું છે. આ ઉપરાંત અમદાવાદને કલ્ચર એન્ડ ઈન્ટીગ્રેટેડ કમાન્ડ એન્ડ કંટ્રોલ સેન્ટર (ICCC) કેટેગરીમાં, અર્થતંત્ર માટે જબલપુર, ગવર્નન્સ એન્ડ મોબિલિટી માટે ચંદીગઢ, સ્વચ્છતા, પાણી અને શહેરી પર્યાવરણ માટે ઈન્દોર, સામાજિક પાસાઓ માટે વડોદરા, હુબલી ધારવાડની પસંદગી કરવામાં આવી છે. ઈનોવેટિવ આઈડિયા કેટેગરી માટે અને સુરતની કોવિડ ઈનોવેશન કેટેગરી માટે પસંદગી કરવામાં આવી છે. આ ઉપરાંત, ઉદ્યોગ માટે પાર્ટનર એવોર્ડ Enviro Control Pvt (Infrastructure), L&T કન્સ્ટ્રક્શન અને PwCને આપવામાં આવ્યો છે. ભારતના રાષ્ટ્રપતિ 27 સપ્ટેમ્બરે ઈન્દોરમાં ISAC 2022 એવોર્ડના વિજેતાઓને સન્માનિત કરશે.

MoHUA તરફથી એક નિવેદનમાં કહેવામાં આવ્યું છે કે, ISAC શહેરો, પ્રોજેક્ટ્સ અને નવીન વિચારોને ઓળખે છે અને પુરસ્કાર આપે છે જે 100 સ્માર્ટ શહેરોમાં ટકાઉ વિકાસને પ્રોત્સાહન આપે છે, તેમજ સમાવેશી, સમાન, સલામત, સ્વસ્થ અને ઉત્સાહી ભાગીદાર શહેરોનું નિર્માણ કરે છે, જેનાથી જીવનની ગુણવત્તામાં વધારો થાય છે. આ અગાઉ ISAC ની 2018, 2019 અને 2020 માં ત્રણ આવૃત્તિઓ થઈ છે.