ચૂંટણી પંચે 16 રાજ્યોની 58 રાજ્યસભા બેઠકો માટેનો કાર્યક્રમ જાહેર કર્યો

ગુજરાતની ચાર રાજ્યસભાની સીટ માટે યોજાશે મતદાન

ચૂંટણી પંચે 16 રાજ્યોની 58 રાજ્યસભા બેઠકો માટેનો કાર્યક્રમ શુક્રવારે જાહેર કર્યો હતો. આ બેઠકોનું પ્રતિનિધિત્વ કરનાર સભ્યોનો કાર્યકાળ આ વર્ષે એપ્રિલ-મેમાં સમાપ્ત થઇ રહ્યો છે. જેમાં ઉત્તર પ્રદેશમાંથી 10, મહારાષ્ટ્ર અને બિહારમાંથી 6-6, પશ્ચિમ બંગાળ અને મધ્યપ્રદેશમાંથી 5-5 અને ગુજરાત-કર્ણાટકમાંથી 4-4 બેઠકો છે. આ અંગેની અધિસૂચના પાંચમી માર્ચે જાહેર કરવામાં આવશે. જો જરૂર પડશે તો 23 માર્ચે મતદાન કરવામાં આવશે. ચૂંટણી પંચ કેરલમાંથી રાજ્યસભાની એક બેઠક માટેની ચૂંટણી તે જ દિવસે કરાવશે. ગુજરાતની ચાર બેઠકોમાં હાલ અરૂણ જેટલી, મનસુખ માંડવીયા, પરૂષોત્તમ રૂપાલા અને શંકર વેગડ રાજ્યસભાના સાંસદ છે. જેમનો કાર્યકાળ એપ્રિલ-મેમાં પૂરો થશે.