પ્રધાનમંત્રી અને રાષ્ટ્રપતિએ ભારતીય નૌસેના દિનની પાઠવી શુભેચ્છાઓ 

દર વર્ષે 4 ડિસેમ્બરે દેશભરમાં નૌકાદળ દિવસની ઉજવણી કરવામાં આવે છે. આ ઉજવણી પાછળ નૌકાદળની વિશેષ સિદ્ધિ છે. 1971 માં બાંગ્લાદેશની આઝાદી માટે ભારત અને પાકિસ્તાન વચ્ચે યુદ્ધ થયું હતું. તે યુદ્ધની ઘટનાઓમાં 4 ડિસેમ્બરની તારીખે ભારતીય નૌકાદળે પાકિસ્તાનના કરાચી નેવલ બેઝ પર હુમલો કરીને તેનો નાશ કર્યો હતો. આ દિવસ તેની સફળતાની યાદમાં ઉજવવામાં આવે છે. 

પ્રધાનમંત્રી મોદીએ ટ્વીટ કરીને કહ્યું કે, નૌકાદળ દિવસ પર શુભેચ્છાઓ. ભારતીય નૌકાદળના અનુકરણીય યોગદાન પર અમને ગર્વ છે. આપણું નૌકાદળ તેની વ્યાવસાયિકતા અને ઉત્કૃષ્ટ હિંમત માટે વ્યાપકપણે સન્માનિત છે. આપણા નૌકાદળના કર્મચારીઓ કુદરતી આફતો જેવી કટોકટીની પરિસ્થિતિઓને ઘટાડવામાં હંમેશા મોખરે રહ્યા છે. 

રાષ્ટ્રપતિ રામનાથ કોવિંદે ટ્વિટ કરીને કહ્યું કે, નેવીના તમામ કર્મચારીઓ, ભૂતપૂર્વ સૈનિકો અને તેમના પરિવારોને શુભેચ્છાઓ. દરિયાઈ ક્ષેત્રની સુરક્ષા અને દરિયામાં અમારા હિતોની રક્ષા કરવા ઉપરાંત, અમારી નૌકાદળે કોવિડ-19 સંબંધિત કટોકટીનો સામનો કરવામાં પણ મહત્વપૂર્ણ ભૂમિકા ભજવી છે. ભારતીયો તમારી સેવા માટે આભારી છે.