બિહારને મળી 350 કિમીના માર્ગોના નિર્માણની ભેટ, અન્ય રાજ્યો સાથે વ્યવહાર બનશે સરળ

બિહારને વિકાસશીલ અને પ્રગતિશીલ બનાવવાના સંકલ્પ સાથે કેન્દ્ર સરકાર દ્વારા મોટી ભેટ આપવામાં આવી છે. પ્રધાનમંત્રી નરેન્દ્ર મોદીએ આજે વિડીયો કોન્ફરન્સિંગના માધ્યમથી બિહારમાં 9 રાજમાર્ગ પરિયોજનાની આધારશિલા રાખી હતી.

આ પરિયોજના અંતર્ગત બિહારમાં 350 કિલોમીટરના માર્ગોનું નિર્માણ કરવામાં આવશે. જેનાથી બિહારના વિકાસને વેગ મળશે અને બિહાર ઉપરાંત પાડોશી રાજ્યો ઝારખંડ તથા ઉત્તરપ્રદેશના લોકો અને સામાનની હેરફેર પણ સરળ બની જશે.

આ ઉપરાંત પ્રધાનમંત્રી નરેન્દ્ર મોદીએ, ઓપ્ટિકલ ફાઈબર ઈન્ટરનેટ સેવાનું પણ ઉદ્ધાટન કર્યું હતું. જેના દ્વારા બિહારના તમામ 45 હજાર 945 ગામોને ઓપ્ટિકલ ફાઈબર ઈન્ટરનેટ સેવાનાં માધ્યમથી જોડવામાં આવશે. આ અવસરે પ્રધાનમંત્રીએ જણાવ્યું હતું કે, આજે ભારત પોતાના ગામડાઓને આત્મનિર્ભર બનાવવાના માટે પગલાં લઈ રહ્યું છે.

એક હજાર દિવસોમાં ઓપ્ટિકલ ફાયબલ ઈન્ટરનેટના માધ્યમથી 6 લાખ ગામડાઓને જોડવામાં આવશે અને દરેક ગામમાં ઝડપી ઇન્ટરનેટ પહોંચતા ભણતર સહેલુ થશે.

પ્રધાનમંત્રીએ જણાવ્યું કે, આજે ભારત ડિજીટલ ટ્રાન્ઝેક્શન કરનારા દેશોમાં અગ્રણી છે. ઓગસ્ટ મહિનામાં યુપીઆઈ દ્વારા 3 લાખ કરોડ રૂપિયાનું ટ્રાન્ઝેક્શન થયું હતું. આ અવસરે પ્રધાનમંત્રીએ નવા કૃષિ સુધારા અંગે પણ વાત કરી હતી. તેમણે જણાવ્યું હતું કે, આ કાનૂન અને ફેરફાર કૃષિ મંડીઓની વિરોધમાં નથી.