લાખો પ્રવાસી પક્ષીઓનું શિયાળાનું સરનામું એટલે કચ્છનું નાનું રણ

કચ્છમાં આવેલ નાના રણમાં આશરે 5000 હજાર ચોરસ કિલોમીટરમાં ફેલાયેલ વિસ્તારમાં દર વર્ષે શિયાળામાં હજારો કિલોમીટરનું અંતર કાપીને લાખો પ્રવાસી પક્ષીઓ આવે છે. આ વર્ષે પણ અહીં ફ્લેમિંગો, સ્પૂન બિલ, કુંજ, ટિલોર, પેરિગ્રીન ફાલ્કન, રણ ચકલી, નાઈટ જાર અને ડેમોલિન જેવા અલગ અલગ જાતનાં પક્ષીઓ આવ્યા છે. આ બધા યુરોપિય પક્ષીઓ અહીં લગભગ ચાર મહિના જેટલું રોકાતા હોય છે. કચ્છનાં નાના રણનો આ વિસ્તાર જંગલી ગધેડા જે ઘુડખર તરીકે ઓળખાય છે, તેના અભ્યારણ્ય તરીકે આરક્ષિત છે. અહીં આ પક્ષીઓને કોઈ પણ પ્રકારની તકલીફ ન પડે એમ અભ્યારણ્ય દ્વારા જ કાળજી લેવામાં આવે છે. આમ તો આ સમયે આ રણમાં હજારો પ્રવાસીઓ રણની મુલાકાત લેતા હોય છે પરંતુ આ વર્ષે પહેલા કોરોના અને ત્યાર બાદ બર્ડફ્લૂનાં કારણે પ્રવાસીઓ માટે અત્યારે પ્રવેશ બંધ છે. આ સમયે યુરોપિય દેશોમાં વધુ ઠંડી અને બરફ હોય છે જેથી આ પક્ષીઓને ત્યાં પુરતો ખોરાક મળતો નથી માટે આ બધા પક્ષીઓ અહીં આવે છે, અહીંનું વાતાવરણ પણ એમને અનુકૂળ આવે છે, એટલા માટે જ આ લાખો પ્રવાસી પક્ષીઓનું શિયાળાનું સરનામું આ કચ્છનું નાનું રણ બની રહે છે.