સોશિયલ મીડિયા એપ્સ વોટ્સએપ, ઈન્સ્ટાગ્રામ અને ફેસબૂકના સર્વર ડાઉન થયા

શુક્રવારે મોડી રાત્રે સોશિયલ મીડિયા એપ્સ વોટ્સએપ, ઈન્સ્ટાગ્રામ અને ફેસબૂકનું સર્વર ડાઉન થયું હતું. ભારત જ નહીં સમગ્ર વિશ્વમાં લાખો યુઝર્સ વોટ્સએપ, ઈન્સ્ટાગ્રામ અને ફેસબૂકનો ઉપયોગ કરી શક્યા નહોતા. જોકે, હજી સુધી તેનું કારણ જાણી શકાયું નથી. પરંતુ અડધો કલાક સર્વર ડાઉન રહ્યા બાદ વોટ્સએપ, ઈન્સ્ટાગ્રામ અને ફેસબૂક ફરી શરૂ થઈ ગયા હતા. કંપનીએ આ સંદર્ભમાં કોઈ સત્તાવાર નિવેદન આપ્યું નહોતું. પરંતુ પછી વોટ્સએપ અને ઈન્સ્ટાગ્રામ દ્વારા ટ્વિટ કરીને એ સમસ્યાનું સમાધાન થઇ ગયું છે તે જાણકારી આપી હતી.

વોટ્સએપ, ઈન્સ્ટાગ્રામ અને ફેસબૂક બંધ થઈ જતાં સોશિયલ મીડિયા યુઝર્સે ટ્વીટર પર આ અંગે ફરિયાદ કરવાનું શરૂ કરી દીધું હતું. અનેક યુઝર્સે ટ્વીટર પર ત્રણેય ઈન્સ્ટન્ટ મેસેજિંગ એપની મજાક ઉડાવતા મીમ્સ શૅર કર્યા હતા. ઈન્સ્ટાગ્રામ એપને ખોલતાં યુઝર્સ ફીડ રીફ્રેશ કરી શકતા નહોતા. તેમને ફીડ રીફ્રેશ થઈ શકતા ન હોવાનો મેસેજ મળતો હતો.  વેબ સર્વિસીસના સ્ટેટસ ટ્રેક કરતી વેબસાઈટ ડાઉન ડીટેક્ટરે વોટ્સએપ, ઈન્સ્ટાગ્રામ અને ફેસબૂક ડાઉન હોવાનું દર્શાવ્યું હતું. આ વર્ષે ફેબ્રુઆરીમાં પણ આ સોશિયલ મીડિયા એપ્સ બંધ થઈ ગઈ હતી.