વિશ્વ બેડમિન્ટન ચેમ્પિયનશીપમાં સિલ્વર મેડલ જીતનાર કિદામ્બી શ્રીકાંત પહેલો ભારતીય બન્યો

વિશ્વ બેડમિન્ટન ચેમ્પિયનશીપની ફાઈનલમાં કિદામ્બી શ્રીકાંતે સિલ્વર મેડલ જીત્યો. વિશ્વ બેડમિન્ટન ચેમ્પિયનશીપમાં સિલ્વર મેડલ જીતનાર શ્રીકાંત પહેલો ભારતીય બન્યો છે. 

સ્પેનના હુએલવામાં રમાયેલી આ ફાઈનલ સ્પર્ધામાં ભારતના કિદામ્બી શ્રીકાંત અને સીંગાપુરના લોહકીન યુ એ વચ્ચે મુકાબલો રમાયો હતો. આ મેચમાં શ્રીકાંતને હારનો સામનો કરવો પડ્યો છે. શ્રીકાંત સીંગાપુરનાં લોહ કીન યુ એ સામે  21-15, 22-20થી હાર્યો છે. શ્રીકાંત આ સ્પર્ધામાં ફાઈનલ સુધી પહોંચનારા પ્રથમ ભારતીય બન્યા છે. લોહ કીન યુ એ પહેલી ગેમમાં 21-15 થી પોતાના નામે કરી હતી, જ્યારે બીજી ગેમમાં બન્ને ખેલાડીઓ વચ્ચે મજબૂત ટક્કર જોવા મળી, જોકે અંતે લોહ કીન યુ એ 22-20 થી બીજી ગેમ જીતીને મેચ પોતાનાં નામે કરી હતી. 

આ સ્પર્ધામાં ભારતને બ્રોન્ઝ મેડલ પણ મળ્યો છે. બેડમિન્ટન ખેલાડી લક્ષ્ય સૈને આ સ્પર્ધામાં બ્રોન્ઝ મેડલ જીત્યો હતો. વિશ્વ બેંડમિન્ટન સ્પર્ધાની સેમિફાઈનલમાં લક્ષ્ય સેનને પરાજય આપીને કિદામ્બી શ્રીકાંતે સ્પર્ધાની ફાઈનલમાં પ્રવેશ કરીને ઈતિહાસ રચ્યો હતો. સેમિફાઈનલ મેચમાં શ્રીકાંતે લક્ષ્ય સેનને 2-1થી પરાજય આપ્યો હતો. આ પહેલા પ્રકાશ પાદુકોણે 1989 અને બી. સાઈ પરણીતે 2019માં આ સ્પર્ધામાં બ્રોન્ઝ મેડલ જીત્યો હતો.