કડક નિયંત્રણો લંબાવાયા; હવે રાજ્યમાં 36 શહેરમાં કોરોના કર્ફ્યુ

મુખ્યમંત્રી વિજય રૂપાણીની અધ્યક્ષતામાં મંગળવારે કોર કમિટીની બેઠક યોજાઈ હતી. જેમાં કેન્દ્રિય ગૃહ મંત્રાલયે 26મી એપ્રિલે આપેલી માર્ગદર્શિકા સંદર્ભે વધારાના નિયંત્રણો મુકવા અંગેના મહત્વના નિર્ણય કરવામાં આવ્યા હતા. આ બેઠકમાં રાજ્યમાં 29 શહેરમાં રાત્રિ કરફ્યૂ લંબાવવાનો નિર્ણય કરવામાં આવ્યો છે.આ સાથે જ હવે ડીસા, અંકલેશ્વર, વાપી, મોડાસા, રાધનપુર, કડી અને વિસનગર સહિત કુલ 36 શહેરમાં રાત્રે 8 વાગ્યાથી સવારે 6 વાગ્યા સુધી કોરોના કરફ્યૂ અને વધારાના નિયંત્રણો કરવામાં આવશે. આ 36 શહેરમાં 6 મેથી 12 મે સુધી રાત્રિ કરફ્યૂ રહેશે. જોકે, નિયંત્રણો દરમિયાન અનાજ-કરિયાણાની દુકાન, શાકભાજી, મેડિકલ સ્ટોર, ડેરી, બેકરી, ખાદ્યપદાર્થોની દુકાનો સહિત આવશ્યક સેવાઓ ચાલુ રહેશે.જ્યારે 36 શહેરમાં તમામ ઉદ્યોગ, ઉત્પાદન એકમો, કારખાનાઓ, બાંધકામની પ્રવૃત્તિઓ રાબેતા મુજબ ચાલુ જ રહેશે. આ ઉપરાંત ખાનગી ઓફિસમાં 50 ટકા સ્ટાફની હાજરીમાં કામ કરવું પડશે.