આંતરરાષ્ટ્રીય વેપાર વૃદ્ધિમાં ભારતીય કંપનીઓની મોટી ભૂમિકા : એસ. જયશંકર

કેન્દ્રીય વિદેશ મંત્રી એસ. જયશંકરે જણાવ્યું કે નાણાકીય વર્ષ 2022-23માં લેટિન અમેરિકા અને કેરેબિયન દેશો સાથે ભારતનો વેપાર વધીને $50 બિલિયન થઈ ગયો છે. વિદેશ મંત્રી સુબ્રહ્મણ્યમ જયશંકરે આજે નવી દિલ્હીમાં કોન્ફેડરેશન ઓફ ઈન્ડિયન ઈન્ડસ્ટ્રી એન્ડ લેટિન અમેરિકા એન્ડ કેરેબિયન-એલએસી કોન્ફરન્સને સંબોધતા કહ્યું હતું કે વેપાર વૃદ્ધિમાં ભારતીય કંપનીઓની મોટી ભૂમિકા છે.

જયશંકરે કૃષિ, ઉર્જા, માહિતી ટેકનોલોજી, ફાર્માસ્યુટિકલ્સ, ઉત્પાદન અને ઓટો મોબાઈલ સહિતના વિવિધ ક્ષેત્રોમાં મજબૂત હાજરી સ્થાપવા બદલ ભારતીય કંપનીઓની પ્રશંસા કરી હતી. આ દેશો સાથે ભારતના વેપારનો ઉલ્લેખ કરતાં વિદેશ મંત્રીએ કહ્યું કે ગયા વર્ષે ભારતે બ્રાઝિલમાં $10 બિલિયન, મેક્સિકોમાં $5 બિલિયન અને ડોમિનિકન રિપબ્લિકને $329 મિલિયનની નિકાસ કરી હતી. તેમણે કહ્યું કે ભારત જન ઔષધિની તર્જ પર પીપલ્સ ફાર્મસીના ખ્યાલને સમર્થન આપી રહ્યું છે.

તેમણે વધુમાં કહ્યું કે છેલ્લા નવ વર્ષમાં ભારત અને લેટિન અમેરિકા અને કેરેબિયન દેશો વચ્ચે 34 ઉચ્ચ સ્તરીય મુલાકાતો થઈ છે. તેમણે લેટિન અમેરિકા અને કેરેબિયનમાં પાવર ટ્રાન્સમિશન સહિત વિકાસ પ્રોજેક્ટના અમલીકરણમાં ભારતની ભાગીદારી પર પ્રકાશ પાડ્યો હતો. જયશંકરે જણાવ્યું હતું કે ભારતે વિવિધ ભાગીદાર દેશોને 35 પ્રોજેક્ટ્સ માટે લાઇન ઓફ ક્રેડિટ હેઠળ લગભગ $900 મિલિયન આપ્યા છે અને તેમાંથી 21 પ્રોજેક્ટ પૂર્ણ થયા છે.