બજેટ 2022 :રાષ્ટ્રપતિના ભાષણથી બજેટની શરૂઆત, પીએમ મોદીએ કહ્યું ખુલ્લા મનથી થાય ચર્ચા 

સંસદનું બજેટસત્ર આજથી શરૂ થઈ રહ્યું છે. એની શરૂઆત રાષ્ટ્રપતિ રામનાથ કોવિંદના સંબોધનથી કરવામાં આવી છે. તેમણે સંસદનાં બંને ગૃહોને સંબોધિત કર્યા છે. મંગળવારે બજેટ રજૂ કરવામાં આવશે. બજેટ સત્રની શરૂઆત પહેલાં પ્રધાનમંત્રી નરેન્દ્ર મોદીએ કહ્યું હતું કે બજેટ પર ખુલ્લા મનથી ચર્ચા થાય. આ દેશને એક નવી ઊંચાઈએ લઈ જવાની તક છે. રાષ્ટ્રપતિ રામનાથ કોવિંદે પોતાના સંબોધનમાં કહ્યું કે, કોરોના વાયરસના કારણે વૈશ્વિક મહામારીનું આ ત્રીજું વર્ષ છે, જે દરમિયાન આપણે ભારતના લોકોના લોકતાંત્રિક મૂલ્યોમાં વિશ્વાસ, અનુશાસન અને કર્તવ્યનિષ્ઠા વધુ મજબૂત થતી જોઈ છે.

રામનાથ કોવિંદે રસીકરણ પર કરી વાત

સંસદના બંને ગૃહોની સંયુક્ત બેઠકમાં રાષ્ટ્રપતિ રામનાથ કોવિંદે કહ્યું કે, ભારતમાં બનાવવામાં આવી રહેલી રસીઓ સમગ્ર વિશ્વને રોગચાળામાંથી મુક્ત કરવામાં અને કરોડો લોકોના જીવન બચાવવામાં મહત્વપૂર્ણ ભૂમિકા ભજવી રહી છે. આજે, દેશમાં 90 ટકાથી વધુ પુખ્ત નાગરિકોએ રસીનો એક ડોઝ મેળવ્યો છે, જ્યારે 70 ટકાથી વધુ લોકોએ બંને ડોઝ લીધા છે. સરકાર દ્વારા 64 હજાર કરોડના ખર્ચે શરૂ કરવામાં આવેલ પ્રધાનમંત્રી આયુષ્માન ભારત હેલ્થ ઈન્ફ્રાસ્ટ્રક્ચર મિશન એક પ્રશંસનીય ઉદાહરણ છે. આ માત્ર વર્તમાન સ્વાસ્થ્ય જરૂરિયાતોને પહોંચી વળવામાં મદદ કરશે નહીં, પરંતુ આવનારી કટોકટીઓ માટે દેશને તૈયાર કરશે.

સંસદના બંને ગૃહોની સંયુક્ત બેઠકમાં રાષ્ટ્રપતિ રામ નાથ કોવિંદે કહ્યું, `મારી સરકારનો વિશ્વાસ અંત્યોદયના મૂળ મંત્રમાં છે, જેમાં સામાજિક ન્યાય પણ હોવો જોઈએ, સમાનતા હોવી જોઈએ, સન્માન હોવું જોઈએ અને સમાન તકો પણ હોવી જોઈએ. પ્રધાનમંત્રી ગરીબ કલ્યાણ અન્ન યોજના હેઠળ મારી સરકાર તમામ ગરીબોને દર મહિને મફત રાશન આપી રહી છે. મારી સરકારે જે રીતે જન ધન-આધાર-મોબાઇલ એટલે કે JAM ટ્રિનિટીને નાગરિક સશક્તિકરણ સાથે જોડ્યું છે, તેની અસર પણ આપણે સતત જોઈ રહ્યા છીએ. બેંકિંગ સિસ્ટમ સાથે 44 કરોડથી વધુ ગરીબ દેશવાસીઓના જોડાણને કારણે, કરોડો લાભાર્થીઓને રોગચાળા દરમિયાન સીધા રોકડ ટ્રાન્સફરનો લાભ મળ્યો છે.

તેમણે વધુમાં જણાવ્યું કે ટોક્યો ઓલિમ્પિક દરમિયાન, આપણે બધાએ ભારતની યુવા શક્તિની ક્ષમતા જોઈ છે. ટોક્યો પેરા-ઓલિમ્પિકમાં ભારતીય પેરા-એથ્લેટ્સે પણ 19 મેડલ જીતીને રેકોર્ડ બનાવ્યો હતો. આ વર્ષે 10 રાજ્યોની 19 એન્જિનિયરિંગ કોલેજોમાં 6 ભારતીય ભાષાઓમાં ભણાવવાની શરૂઆત થઈ રહી છે. આપણી સ્ટાર્ટ-અપ ઇકો-સિસ્ટમ એ અનંત નવી સંભાવનાઓનું ઉદાહરણ છે જે આપણા યુવાનોના નેતૃત્વમાં ઝડપથી આકાર લઈ રહી છે.

રાષ્ટ્રપતિ રામનાથ કોવિંદે કહ્યું કે, સરકારની નીતિઓને કારણે આજે ભારત એવા દેશોમાં છે જ્યાં ઈન્ટરનેટની કિંમત સૌથી ઓછી છે, સ્માર્ટ ફોનની કિંમત પણ સૌથી ઓછી છે. ભારતની યુવા પેઢીને આનો મોટો લાભ મળી રહ્યો છે. સરકારના સતત પ્રયાસોથી ભારત ફરી એકવાર વિશ્વની સૌથી ઝડપથી વિકસતી અર્થવ્યવસ્થા બની ગયું છે. આજે ભારત વિશ્વમાં બીજા નંબરના સૌથી મોટા મોબાઈલ ફોન ઉત્પાદક તરીકે ઉભરી આવ્યું છે. જેના કારણે ભારતના લાખો યુવાનોને રોજગારી પણ મળી છે.