રાજકોટમાં પીએમ નરેન્દ્ર મોદીને મુખ્યમંત્રીના હસ્તે અપાશે 'પ્લેન' ની અનોખી ભેટ

રાજકોટના વિકાસની ઉડાનના પ્રતિક સમાન 'પ્લેન'ને ઇમિટેશનના કારીગરોએ 30 કલાકની જહેમતથી સજાવ્યું છે

પ્રધાનમંત્રી નરેન્દ્ર મોદીના હસ્તે આવતીકાલે 27મી જુલાઈએ રાજકોટમાં અનેક વિકાસ પ્રકલ્પોનું લોકાર્પણ થનાર છે. આ અવસરે મુખ્યમંત્રી ભૂપેન્દ્ર પટેલના હસ્તે પ્રધાનમંત્રી નરેન્દ્ર મોદીને રાજકોટના વિકાસની ઉડાનના પ્રતીક સમાન 'પ્લેન'ની ભેટ આપવામાં આવશે. આ 'પ્લેન'ને રાજકોટની વિશેષતા અને વૈશ્વિક ઓળખ એવા ઇમિટેશન આર્ટથી મઢવામાં આવ્યું છે. રાજકોટ આંતરરાષ્ટ્રીય ગ્રીનફીલ્ડ એરપોર્ટના લોકાર્પણ પ્રસંગને અનુરૂપ વડાપ્રધાનશ્રીને ભેટ આપી શકાય તે માટે રાજકોટના ઇમિટેશન વ્યવસાયિકો દ્વારા આ અઢી ફૂટના વિમાનની પ્રતિકૃતિને સજાવીને તૈયાર કરવામાં આવી છે. 

સૌ પ્રથમ જસદણના એન્ટિક વસ્તુઓના કારીગર દ્વારા મૂળ કાષ્ઠનું અઢી ફુટનું વિમાન બનાવવામાં આવ્યું હતું. એ પછી આ અઢી ફુટની સાઈઝના લાકડાના પ્લેન પર રાજકોટના ઇમિટેશનના કારીગરો દ્વારા વિશિષ્ટ ઇમિટેશનનો ઢોળ ચડાવવામાં આવ્યો હતો. એ પછી ઇમિટેશનની ડાયમંડ અને મોતીની જ્વેલરી જડીને તેને શણગારવામાં આવ્યું છે. આ માટે રાજકોટ ઇમિટેશન જ્વેલરી એસોસિયેશને જહેમત ઉઠાવી હતી અને ઈમિટેશનના નિષ્ણાત 30 કારીગરોને આ કામમાં રોક્યા હતા. આ કારીગરોએ 30 કલાકની સખત મહેનતથી આ 'પ્લેન'ને શણગાર્યું છે. રાજકોટ ઇન્ટરનેશનલ એરપોર્ટના લોકાર્પણ પ્રસંગે આ વિમાનની પ્રતિકૃતિ સમાન રાજકોટના વિકાસની ઉડાનનું પ્રતિક બની રહેશે.