રાજસ્થાનમાં ગંભીર અકસ્માત સર્જાયો, ટ્રકે વાનને ટક્કર મારતાં 9નાં કરૂણ મૃત્યુ

રાજસ્થાનના ઝાલાવાડમાં NH-52 પર ભીષણ માર્ગ અકસ્માત સર્જાયો છે. આ માર્ગ અકસ્માતમાં નવ લોકોના દુઃખદ મૃત્યુ થયા છે. મળતી માહિતી મુજબ, મારુતિ વાન અને ટ્રક વચ્ચે જોરદાર ટક્કર થઈ હતી, જેના કારણે 9 લોકોના ઘટનાસ્થળે જ મૃત્યુ થયા હતા. અકસ્માત સર્જાતા અફરાતફરીનો માહોલ સર્જાયો હતો. હાઈવે પર પણ ચક્કાજામ થઈ ગયો હતો. અકસ્માત અંગે જાણ થતા પોલીસ ઘટના સ્થળે દોડી આવી હતી.  અકસ્માત આજે વહેલી સવારે થયો હતો. મળતી માહિતી મુજબ, તમામ લોકો વાનમાં લગ્ન સમારોહમાં હાજરી આપીને મધ્યપ્રદેશથી ડુગરગાંવમાં પોતાના ઘરે પરત ફરી રહ્યા હતા અને આ દરમિયાન પચોલા પાસે એક બેફામ ટ્રકે વાનને ટક્કર મારી હતી.

અકસ્માતમાં 9 લોકોએ જીવ ગુમાવ્યો

કહેવામાં આવી રહ્યું છે કે તમામ મૃતકો મધ્યપ્રદેશમાં લગ્ન સમારોહમાંથી ઘરે પરત ફરી રહ્યા હતા. મારુતિ વાનમાં મુસાફરી કરી રહેલા લોકો રાજસ્થાનના ડુંગરગાંવના બાગરી સમુદાયના હોવાનું કહેવાય છે, જેઓ અકસ્માતમાં મૃત્યુ પામ્યા હતા. તમામ મૃતકોના મૃતદેહને અકલેરા હોસ્પિટલના શબઘરમાં રાખવામાં આવ્યા છે. અકલેરા પોલીસ ઘટના સ્થળે પહોંચી તપાસ હાથ ધરી છે.

અકસ્માતમાં વાનના ફૂરચેફૂરચા ઊડી ગયા

મૃતકોના મૃતદેહને અકલેરા હોસ્પિટલના શબઘરમાં રાખવામાં આવ્યા છે. આરોપી ટ્રક ચાલકની અટકાયત કરી આગળની કાર્યવાહી હાથ ધરી છે. ઝાલાવાડ એસપી રિચા તોમરના જણાવ્યા અનુસાર, અકસ્માતનો ભોગ બનેલા લોકો બાગરી સમુદાયના હતા, જેઓ એક સંબંધીના લગ્નમાં હાજરી આપવા માટે મધ્યપ્રદેશ ગયા હતા. પરત ફરતી વખતે રવિવારે સવારે 3 વાગ્યાની આસપાસ તે ટ્રક સાથે અથડાઈ હતી, જેના કારણે આ અકસ્માત થયો હતો. જેના કારણે વાનના ફૂરચેફૂરચા ઊડી ગયા હતા.