વિદેશ મંત્રી ડૉ. એસ. જયશંકર આજથી નેપાળની બે દિવસની મુલાકાતે

ભારત આગામી 10 વર્ષોમાં 10 હજાર મેગાવોટ વિજળીની ખરીદી કરશે.

વિદેશ મંત્રી ડૉ. એસ. જયશંકર આજથી નેપાળની બે દિવસીય મુલાકાતે જશે. આ મુલાકાત નેપાળના વિદેશ મંત્રી નારાયણ પ્રસાદ સાહુના આમંત્રણ પર થઈ રહી છે. એસ.જયશંકર આ મુલાકાત દરમિયાન કાઠમંડુમાં ભારત-નેપાળ સંયુક્ત આયોગની 7મી બેઠકની સહ-અધ્યક્ષતા કરશે. મહત્વનું છે કે,  ભારત-નેપાળ સંયુક્ત આયોગની સ્થાપના 1987માં કરાઈ હતી અને આ બંને મંત્રીઓને દ્વિપક્ષીય ભાગીદારીના તમામ પાસાઓની સમીક્ષા કરવા માટે એક પ્લેટફોર્મ પૂરું પાડે છે. આ મુલાકાત દરમિયાન ડૉ. જયશંકર નેપાળના અગ્રણી રાજકીય નેતાઓને પણ મળશે.

બંને દેશોની બેઠક પછી વિદ્યુત વેપાર સમજૂતી કરવામાં આવશે. આ સમજૂતી હેઠળ ભારત આગામી 10 વર્ષોમાં 10 હજાર મેગાવોટ વિજળીની ખરીદી કરશે. વિદેશ મંત્રીની નેપાળ મુલાકાત દરમિયાન ત્રણ નવી ટ્રાંસમિશન લાઈનનું ઉદઘાટન કરવામાં આવશે. આ ત્રણ લાઈનમાં રક્સૌલ-પરવાનીપુર, કુશહા-કટૈયા અને ઉત્તરપ્રદેશની નૌતનવા-મૈનહવાં ટ્રાંસમિશન લાઈન શામેલ છે. ભારત સરકારના સહયોગથી કાઠમંડુમાં આનેલ ત્રિભુવન યુનિવર્સિટીમાં કેન્દ્રીય પુસ્તકાલય ભવનનું ઉદઘાટન કરવામાં આવશે.