અમેરિકાના ભૂતપૂર્વ પ્રમુખ જો બાઈડન ગંભીર પ્રકારના પ્રોસ્ટેટ કેન્સરથી પીડિત હોવાનું જાણવા મળ્યું છે, જે હવે હાડકાં સુધી ફેલાઈ ગયું છે. રવિવારે જારી કરાયેલા એક સત્તાવાર નિવેદનમાં આ માહિતી આપવામાં આવી હતી. 82 વર્ષીય બાઈડને શુક્રવારે જ્યારે યુરીન સંબંધિત ફરિયાદ કરી ત્યારે સમસ્યાની જાણ થઈ. તેમનો પરિવાર અને ડોકટરો હાલમાં શક્ય તેટલી સારવારના વિકલ્પો પર વિચાર કરી રહ્યા છે.
યુક્રેનમાં યુદ્ધનો અંત લાવવા માટે અમેરિકી પ્રમુખ ડોનાલ્ડ ટ્રમ્પ સોમવારે રશિયન પ્રમુખ વ્લાદિમીર પુતિન, યુક્રેનિયન પ્રમુખ વ્લાદીમર ઝેલેન્સકી અને વિવિધ NATO દેશોના નેતાઓ સાથે અલગ-અલગ વાતચીત કરશે. સોશિયલ મીડિયા પોસ્ટમાં પ્રમુખ ટ્રમ્પે લખ્યું કે, ચર્ચાનો વિષય યુદ્ધ અટકાવવાનો રહેશે. આ યુદ્ધમાં દર અઠવાડિયે રશિયા અને યુક્રેનના પાંચ હજાર સૈનિકો જીવ ગુમાવી રહ્યા છે. રશિયન સરકારના પ્રવક્તા દિમિત્રી પેસ્કોવે પુષ્ટિ કરી હતી કે, પ્રમુખ પુતિન અને અમેરિકન પ્રમુખ વચ્ચે ટેલિફોનિક વાતચીતની તૈયારીઓ ચાલી રહી છે.
ઇન્ડિયન પ્રીમિયર લીગની 60મી મેચમાં ગુજરાત ટાઇટન્સે દિલ્હી કેપિટલ્સ સામે 10 વિકેટથી વિજય મેળવ્યો છે. આ જીત સાથે ગુજરાતના 12 મેચમાં 18 પોઈન્ટ થયા છે અને હવે ટીમ પોઈન્ટ ટેબલમાં ટોચ પર પહોંચી ગઈ છે. ગુજરાતે પ્લેઓફ માટે પણ ક્વોલિફાય કર્યું છે. આ સાથે, RCB અને પંજાબની ટીમોની પ્લેઓફ ટિકિટ પણ કન્ફર્મ થઈ ગઈ છે. આ મેચ અરુણ જેટલી સ્ટેડિયમમાં રમાઈ હતી. આ મેચમાં ટોસ જીત્યા બાદ ગુજરાતે પ્રથમ બોલિંગ કરવાનો નિર્ણય લીધો હતો. પ્રથમ બેટિંગ કરતા દિલ્હીએ કે.એલ.રાહુલની સદીના આધારે ગુજરાતને 200 રનનો લક્ષ્યાંક આપ્યો હતો. જેના જવાબમાં, ગુજરાતે સાઈ સુદર્શનની સદીની મદદથી 19 ઓવરમાં લક્ષ્યનો પીછો કર્યો હતો.
પશ્ચિમ રેલ્વેના અમદાવાદ મંડળ રેલ પ્રબંધક કાર્યાલય, અમદાવાદમાં ત્રિરંગા રેલી મંડળ રેલ પ્રબંધક કાર્યાલયથી શરૂ થઈ નિર્માણ ભવન થઈને સમાપ્ત થઈ. વટવા માં આ રેલી ઇલેક્ટ્રિક લોકો શેડ થી શરૂ થઈને વટવા રેલ્વે સ્ટેશન સુધી કાઢવામાં આવી હતી. આ જ પ્રકારે સાબરમતીમાં ડીઝલ શેડ થી શરૂ થઈને ન્યુ કોલોની, રેલ્વે કોલોની, મુખ્ય માર્ગ, અને રેલ્વે હોસ્પિટલ થઈને વિજય ધ્વજ રેલી આયોજિત કરવામાં આવી હતી . સ્કાઉટ ગાઈડના બેન્ડ, મહિલા પ્રતિભાગીઓ અને બાળકો એ પણ આ રેલીમાં ઉત્સાહપૂર્વક ભાગ લીધો હતો.
ગુજરાત પોલીસ અને સાયબર સેલની છેલ્લા 15 દિવસમાં રાજ્યના ચાર મહાનગરો – અમદાવાદ, સુરત, રાજકોટ અને વડોદરાની સાયબર ક્રાઇમ ટીમો તથા સ્ટેટ સાયબર ક્રાઇમ સેલે 12 મહત્વના કેસો ઉકેલીને ચાઇનીઝ સાયબર ક્રાઇમ ગેંગના સાગરીતો અને ડિજિટલ એરેસ્ટ જેવા ગુનાઓ આચરનારા ભેજાબાજોને ઝડપી પાડ્યા છે. ગૃહ રાજ્ય મંત્રી હર્ષ સંઘવીએ આ સફળતા બદલ ગુજરાત પોલીસની તમામ ટીમો અને તેમને માર્ગદર્શન આપનાર અધિકારીઓને અભિનંદન પાઠવ્યા છે.
મુખ્યમંત્રી ભૂપેન્દ્ર પટેલે તિરંગા યાત્રાને લઈને સોશિયલ મીડિયા પ્લેટફોર્મ X પર પોસ્ટ કરી હતી. તેમણે પોસ્ટમાં લખ્યું, "ઓપરેશન સિંદૂર એ ભારતીય સેનાના અપ્રતિમ શૌર્ય અને બહાદુરીનું પ્રતીક છે, અને સ્થાનિક રહેવાસીઓ સાથે તેની ઉજવણી કરવા માટે મારા વિધાનસભા મતવિસ્તાર ઘાટલોડિયામાં આયોજિત તિરંગા યાત્રામાં ભાગ લેવાની તક મળી, જે દેશભક્તિની ચેતના જગાડવાની એક શ્રેષ્ઠ તક હતી."બીજી પોસ્ટમાં તેમણે લખ્યું, “આ યાત્રામાં લપકામણ, લીલાપુર, ખોડિયાર અને આસપાસના ગામોના સેંકડો યુવાનોએ ઉત્સાહપૂર્વક ભાગ લીધો.
તાજેતરમાં જ મુખ્યમંત્રી ભૂપેન્દ્ર પટેલના નેતૃત્વ હેઠળ ગુજરાતના વડનગર ખાતે ભારતના સૌપ્રથમ આર્કિયોલોજિકલ એક્સપિરિયન્સ મ્યુઝિયમનું નિર્માણ કરવામાં આવ્યું છે, જે પ્રાચીનતમ વડનગર શહેરનો ભવ્ય ઇતિહાસ પ્રદર્શિત કરે છે. ઉલ્લેખનીય છે કે, 18 મે નો દિવસ ‘ઇન્ટરનેશનલ મ્યુઝિયમ ડે’ તરીકે ઊજવવામાં આવે છે, જેની વર્ષ 2025 માટેની થીમ છે ‘ધ ફ્યુચર ઑફ મ્યુઝિયમ્સ ઇન રેપિડલી ચેન્જિંગ કોમ્યુનિટીઝ’ એટલે કે, ઝડપથી બદલાઈ રહેલા સમુદાયોમાં મ્યુઝિયમનું ભવિષ્ય.
ભારતીય સેનાની કાર્યવાહીથી પાકિસ્તાનની કમર તૂટવા લાગી, તેમ તેમ વ્યૂહાત્મક નાજુકતાનું સંકટ વધવા લાગ્યું. પશ્ચિમ અને ઉત્તરીય સરહદો પર વધતી ઉશ્કેરણી વચ્ચે ઇસ્લામાબાદે નેશનલ કમાન્ડ ઓથોરિટીની બેઠક બોલાવી. ભલે આ પગલું પ્રતીકાત્મક હતું, પણ તેનો અર્થ ખૂબ ઊંડો હતો. તમને જણાવી દઈએ કે નેશનલ કમાન્ડ ઓથોરિટી એ સંસ્થા છે જે પાકિસ્તાની પરમાણુ શસ્ત્રો અને પરમાણુ મિસાઇલોને નિયંત્રિત કરે છે, તેના અધ્યક્ષ પાકિસ્તાની પ્રધાનમંત્રી હોય છે. આ બેઠકને નવી દિલ્હી પર ખતરો અને દબાણ તરીકે જોવામાં આવી રહી હતી.
કેન્દ્રીય મંત્રી જયંત ચૌધરીએ લોન્ચ સમયે જણાવ્યું હતું કે આ સાધન દેશના દરેક નાગરિકને શીખવા અને નોકરીની માહિતી મેળવવાની એક નવી અને સરળ રીત આપશે. AI અને WhatsApp ની મદદથી, લોકો હવે તેમના ઘરેથી વ્યક્તિગત માર્ગદર્શન મેળવી શકશે, જેનો ખાસ કરીને ગામડાઓ અને દૂરના વિસ્તારોના લોકોને ફાયદો થશે. મેટા ઇન્ડિયાના વાઇસ પ્રેસિડેન્ટ શિવનાથ ઠુકરાલે જણાવ્યું હતું કે આ પહેલ દર્શાવે છે કે ઓપન-સોર્સ ટેકનોલોજી દ્વારા સમાજમાં મોટા ફેરફારો લાવી શકાય છે. તેમણે કહ્યું કે સ્કિલ ઇન્ડિયા આસિસ્ટન્ટ ભારતના ડિજિટલ અને સમાવિષ્ટ વિકાસના વિઝનને મજબૂત બનાવશે.
નોડલ ઓફિસર રાહુલ ચૌબેએ જણાવ્યું હતું કે કેદારનાથ ધામ ખાતે એક દર્દીને બચાવવા માટે પહોંચેલી સંજીવની હેલી એમ્બ્યુલન્સનું ઇમરજન્સી લેન્ડિંગ કરવામાં આવ્યું હતું. પાયલોટની સતર્કતાને કારણે મોટી દુર્ઘટના ટળી ગઈ. આ હેલિકોપ્ટરમાં AIIMS ઋષિકેશની મેડિકલ ટીમ પણ સવાર હતી. હેલિકોપ્ટરમાં પાઇલટ સહિત બે ડોક્ટર સુરક્ષિત છે. તેમણે જણાવ્યું કે કેદારનાથ ધામના દર્શન કરવા આવેલી એક મહિલા ભક્તને શ્વાસ લેવામાં તકલીફ થવા લાગી. જ્યારે તેમની તબિયત બગડી ત્યારે રાજ્ય સરકારની હેલી એમ્બ્યુલન્સ સેવા સંજીવનીની મદદ લેવામાં આવી. હેલિકોપ્ટર સાથે AIIMS ની એક મેડિકલ ટીમ પણ કેદારનાથ પહોંચી રહી હતી.
